Taimi Haihambo
HELAO NAFIDI – Paulina Nghipunya omunamido 35 ota longele ehandukilo laye leedula 10 kevyulonghalo koWindheok, eshi omahepeko oomeme nounona e mu twalifa mokakuma.Nghipunya ehokololo laye ola li la kuma vahapu, pefimbo a li te liyandje komutumba wovakainhu oo wa li keesaala daHelao Nafidi koshitukulwa shaHangwena, nowa li wa kwatelwa komesho komutoolinghundana wedina Fillemon Amoolongo a shiivika nawa nedina DJ Munene. Nghipunya okwa ti meputuko laye, okwa kala ta tekulwa kumbushe nokwa li e mu hole neenghono, ashike nande ongaho mbushaye mohombo okwa li e li mo ta li ta pi. Okwa ti okwa kala ta hepekwa neenghono komushamane waye, osho sha etifa ohombo yavo i teke, yee Nghipunya ta i a ka kale nainakulu shaashi ka li vali ta dulu okulamba mbushe. “Kumeekulu, onghalo okwa li tai nyengafana – unene pashimaliwa. Osha fininika meekulu a tume nge koWindhoek kumeme, oo kwa li ehe hole nge nandenande,” Nghipunya ta hokolola.
Eshi a ya koWindhoek kuina, vati okwa ka tameka te mu fininike a ye momilele novashame ovakulunhu, opo va dule oku kala tave mu wanifile po eemhumbwe daye shaashi vati ita dulu oku mu wanifila po.
“Omukalo u li ngaha okwa li hau lulumike nge neenghono komwenyo, nefiku limwe omushamane umwe okwa etela nge onghenda nokwa pa nge oshimaliwa opo ndi ye koWalvis Bay,” ta ti. Eshi a ya koWalvis Bay vati okwa shakenako nomumati oo va ka dala naye ounona. “Eshi twa shakena, aishe oya li tai ende nawa neenghono, fyee natate wounona vange okwa li tu uditafane lela shaashi ohole yopetameko oifuula,” Nghipunya ta ti. Ta ti konima yefimbo omulumenhu waye okwa tameka oku mu ningila omahepoko okolutu, opamadiladilo, osho yo pamilele. Konima eshi a mona kutya itashi di vali, okwa tokola vati a shune keumbo kuinakulu, nokaana kaye kokamati komido nhatu. Eshi a shuna kuinakulu, okwa didilika kutya oku li meteelelo. MuSepetemba 2013, okwa mona vati okaana kokamati. “Eshi nda mona okaana, onda lombwela tate wako, ashike okwa lombwela nge kutya inandi mu dengela vali shaashi ye okwa mona po omukainhu umwe, ndele te mu pe ongodi a popye naame,” Nghipunya ta ti.
Okwa twikila kutya onghundana oya li ye mu udifa nai neenghono, nokakwa li vali ta diladila nawa. “Onda ka kwatwa kediladilo loku ka konga oilonga ngeno, ashike omadiladilo okwa fiya nge po. Onda kufa okaana kange koivike itatu osho yo aka keedula nhee, hatu i petale ndele handi ka umbile momeva. Konima eshi nda mona kutya oka xulifa, onde ka tonyena mominambo ndele handi ka fudike. Ashike nomoule wokafimbo kanini onda kwatwa po,” ta ti. Okwa ti okwa monika ondjo mo 2022, fiyo opapa okwa longa ko ehandu laye eedula di li nhee, omo a teelelwa akale a mangululwa modula tai ya kefilonghenda.
Okwa ti ngeno okwa li a mona ohole petameko, ngeno hapo e li nena apa. Okwa ti onghalamwenyo yaye aishe okudja ashike manga mushona okwa kula e li mokati komahepoko okudja eshi a li okaana, fiyo tae mu tanaukile po.“Onda hala okukunghilila ovadali aveshe ve li apa nena, va kale ve hole ounona wavo, vo tava kelele okutula omahandu a etifwa kooxe younona mounona. Fileni yo ounona veni oshisho, nye tamu kala hamu ka konga omakwafo peenhele di li mondjila ngeenge mwa taalela omaupyakadi, ponhele yokutula eendjo mounona,” Nghipunya ta ti
Okwa ti okwe lihongela okuhondja modolongo, noshitalendi shaye osho ta ka longifa kondje ngeenge a manguluka ongouxupilo waye. Okwa ti oku na odjuulufi yokumona okaana kaye oko a ninga efimbo a topolwa nako.
-taimihaihambo2000@gmail.com