Jazema Hangero 

Omuhohize wombazu Dave Veziruapi Rukero u nongendo nomahongero wongaro novitjitwa vyomuhoko motjiwaṋa na pomaṱunḓu nga yaruka ombunda.

Wari omuhungire pohambo yombazu mOkavisume omayuva tji ya ri 18 omweze mbwazuko. Ngumatja nambano nga uta okuremanisa, nokungundiparisa omekuriro wayo. Rukero ma tja ombazu i sokuhongwa eyuva nga keyuva poo movikando. Novandu mave sokukara noruveze pu mave woronganene. Kutja mave woronganisiwa i yovanane vombazu okutara komapu pekepeke. Rukuru ovandu aave woronganene porui rwozongombe, otjiwaṋa paatji zemburikisasana nokuhongasana oviṋenge vyombazu pekepeke. Tjimuna oukura, ongaondjisiro yomikandi, okupurura, omiṱanḓu, omayakisiro womaruwo; ozombakero na vyarwe ovingi.

Ovandu okutokerwa pezuko Tjikukae poo Tjikuume a serekarere oviṋa kozonḓiṱona nai oviṋa mbya yanda. Ozonḓiṱona aaze toora oviṋa mbi okurihongera ko nokutwara komurungu. Omayarukiro wombunda wovitjitwa mbi ya tuṋa tjinene komahongero, omekurisiro nomatunduuziro wombazu. 

Erose ondjari okaendjezewa. Ovandu motjirongo aave kara omundu ngu va toorora ngu ve pitisira ozombuze poo ozondaze. Erose onya yonḓuno ndjai rombwa nomahira wozonuitji okutunga otjikoyo tjombosiro nga tji mai kaṱiṱipara komayandero wayo. Ai posisa ombosiro kaaṋi. Ombosiro aihe ai tjivisa ombuze yayo yapeke kutja: muhuka ombura mai roko, ku notjikaka, nai kwa ṱu ombara yotjirongo poo ku nombongarero. 

“Ondjembo yOtjivi Tjouanga ya yeta oviṋa ovingi motjiwaṋa tjetu, tjimwe tjavyo ouhuura. Ohuurire ya tjita kutja ovandu vetu ve rizembe, ve rihahize nokuriṋeṋuna nu otji va uta okutonda nokunakaura ombazu, omaraka nozongamburiro zawo. Ehupo romuhoko ra runduruka okuza kovikurya, omizumbi, nomiano vyawo vyokupunda.” 

Rukero wa tjere. Na weza kutja ovanene (ovakurundu) okuhina okupuratena oviṋa kovanene vovanenene vawo (ovakwate vawo) mbe ve yeta kombanda yehi, itjimwe tjoviṋa mbya tjita kokutja ombazu i pandjare onḓengu yayo ohomonena. 

Rukero wa ningire ovandu vevari mba sewa po ve kondjise nomasa okuhakayenisa ovandu ve kapitise ounongo nondjiviro ndjo komitanda. 

“Tu sokuuta okuungurisa otungovi komahongero nomekurisiro wombazu kutja vi vatere okupwika ombazu yetu, okutjanga nokutwa mozonḓengura oongaro ndji mai kotora omitanda popezu nombazu. Ombazu yetu ai kayenda komurungu ai ha zemi nokukoka “ Rukero wa tjere.