ONHUNO – Oshibofa shomupolifi Sergeant Dimbulukeveni Namhila weedula 43 ou vati a dipaela omushingi wololi peinda lopolifi pOnhuno, osha undulilwa komafiku 17 Juni opo ku ningwe omakonakono omoule. 

Omukulunhu wopolifi moshitukulwa shaHangwena Commissioner Ottillie Kashuupulwa okwa ti natango omakonakono moshibofa eshi otaa twikile. 

Okwa ti Namhila okwa li a holoka momhangu yamengestalata kOhangwena momafiku3Junimolwashikando oshitivali. 

Namhila okwa yasha Eliud Hamukwa (38) omwedi wa djako keinda lopolifi kOnhuno efimbo loufiku. 

Hamukwa okwa xulifila koshipundi yokomesho mololi  konima eshi aumbwa eeholo lwoikando yayooloka. 

Ofamili 

Ovakwapata vaHamukwa ova pula epangelo opo omakonakono a ningwe pauyuuki pehe na ouyelele tau holekwa. 

Ova hokolola tava ti Hamukwa okwa dipawa ehe na eshi a ninga molwashi okwa hangika e li ashike omutumba mololi. 

Ovati kutya fiyo opapa ina va lombwelwa etomenho kutya molwashike Hamukwa a dipawa. 

David Shilomboleni oku li xekulu yaHamukwa nokwa hokolola ta ti okudja konima yepako ina va mona opolifi ya ya kove okuvalombwela kombinga yomakonakono ile oidjemo oyo ya monika po.

Okwa ti owa fiwa moluhepo molwashi Hamukwa oye kwa li ongudi yepeta. 

fhamalwa@nepc.com. na