Auleria Wakudumo
Ouministeli wehongo, oungoba nomaudano otau ningi omapekapeko okuholola oshietifi shoudiyo oo tau feekelelwa moikulya yovahongwa kosekundefikola yaMaria Mwengere moshitukulwa shaKavango East.
Edi oda hololwa komukulunhu wehongo moshitukulwa Kavango East, Christine Shilima.
Shilima okwa holola kutya ovahongwa va hanga po33 vali va tambulilwa moshipangelo shepangelo shaRundu, sha landula eshi vati va lya oikulya ya lele mekulo lofikola.
“Oikulya oyali ya xupa ko Osoondaxa shaashi ya li ya telekwa ofulundudu,” Shilima ta holola.
Otaku hokololwa kutya konima yokulya oikulya ei, ovahongwa vati ova hovela okuvela medimo, omutwe, olutu tali pu eenghono vamwe ova tameka okukunga.
Ovahongwa aveshe 33 ovali va twalwa koshipangelo oko va tambulilwa kosaala yoICU oufiku oo. Shilima okwa holola kutya ongudu yovanafikola vamwe ovo va lya oikulya ya faafana nayo oyali ya twalwa koshipangelo efiku lashikula ko molwaashi nav ova hovela okuulika omadidiliko afaafana.
Shilima okwa holola yo kutya ouminsteli wouhaku owa tuma ovanambelewa kofikola okuyandja ekwafo lotete kovanafikola opo va kwashilipaleke kutya aveshe ova mona ouhaku wawana po.
Ovahongwa vamwe natango oveli koICU omanga vahapu va lekelwa mo nale. Osekundefikola ya Maria Mwengere oyina omuhandjo oshoyo ovahongwa ve fike po680.
Otaku hokololwa kutya osheetifi shoudiyo inashi shiivika natango nomakonaakono moshinima sha tya ngaho otaa twikile.