Omukulunhufikola ha longele kofikola i li moshitukulwa shaHangwena ou ta tamanekelwa kutya vati okwa kwata okaana kaye onghonga natango onghee ngaa ta ningilwa omakonakono keembelewa dehongo.

Omukulunhuwiliki wehongo moshitukulwa shaHangwena Isak Hamatwi okwa koleka ta ti omutamanekwa ou natango oku li koilonga omanga omakonakono taa manifwa. Omukulunhufikola ou okwa li a kwatwa po neudo keumbo laye kOshakati. Okwa pewa omhito yokulifutila mo modolongo noshimaliwa sheeN$2 000, konima eshi kwa li a holoka momhangu yaShakati. 

Omutamanekwa okwa lombwelwa komhangu opo aha kale mekwatafano nokaana kaye. 

Omakonakono opolifi otaa twikile.  Opolifi oya hokolola tai ti nakuninga oshihakanwa oku na omido 15 noku li mondodo onhi-9 pofikola opo ha pa longo xe.

Oshiningwanima osha ningwa pokati kaDesemba womudo 2023 nosho yo neudo muJanuali.

Otaku hokololwa kutya okaana oka kala nokukwatwa onghonga lwoikando ya yooloka.

Omukulunhu koshikondo shokukonakona oimbuluma wopolifi moshitukulwa shaShana, omupedu Commissioner Fedrick Ndjadila okwa hokolola ta ti okaana okwa li haka di meumbo limwe naxe mOshakati.

Opolifi oya hokolola tai ti omufekelwa okwa ufana omona monduda yaye yokunangala opo e ke mu fule keemhadi.

Okudja opo omukulunhufikola ou okwa lombwela okaana kutya ota ka monika nawa nokuweda po ta ti omonakadona okwa kula paife nokuya moixulo.

Opolifi oya ti omulumenhu ou okwa dima ko kolusheno ndele ta i moixulo nokaana kaye ashike vati ina longifa ongumi.

Okwa lombwela okaana kaye kutya ina ke shi popya komunhu shaashi ota kala a ye modolongo ndele omona ta kala ehe na xe woku mu yambidida.

Opolifi oya ti okaana oka tembulwa po pofikola opo paife, nokeumbo laxe oka tembulwa ko.

-fhamalwa@nepc.com.na