Auleria Wakudumo
Ovaleli vopamufyuululwakalo ova lulilwa koulunga woimuna oo wa ninga muhapu neenghono moshilongo.
Meenghundafana naKundana, omalelo okwa holola kutya ohaa longifa oikundaneki efimbo nefimbo, taa kumaida oshiwana opo shi xulife po oulunga ashike kemanya kundjondwi.
Elenga lakula loshitunda shUukwambi nomunashipundi womalelo opamufyuululwakalo Ovawambo Herman Ndilimani Iipumbu okwa holola kutya elelo lopamufyuululwakalo nalo ohali ungaunga noibofa yoimuna mwa kwatelwa ei ya nyonwa po okupitila moulunga.
“Nakunyonenwa ongobe ile oshimuna shaye shama ashike a tula mo oshibofa shaye ndele ta yadje oumbangi weli xwapo nena nakunyona oha pewa ehandukilo a fute oshimuna shovanhu oshoyo ehandu lokufuta oshipundi pashimaliwa,” Iipumbu ta ti.
Iipumbu okwa weda po ta ti nakunyonenwa oha dulu kupula a futilwe oshimuna ile a pewe oshimaliwa shoongushu yoshimuna shaye.
“Ongobe pamufyuululwakalo oina ongushu yoshimaliwa shi fike poN$2 500 ashike ngeenge oya dipawa, mwene wongobe oye mwene ha yandje ongushu yongobe yaye,” Ndilimani ta weda po.
Ndilimani okwa ti elelo lopamufyuululwakalo olali la tula po elandulafano lokuhashinga oimuna oufiku.
“Otwa li yo hatu pula opo ovalandi voimuna novalandifi va kale vena ouyelele wa wana. Kala una okamutwe nouyelele aushe wanakulanda ile wanakulandifa,” Ndilimani ta ti.
Omupopiliko welelo laUkwanyama Andrew Naikaku okwa holola kutya nakuvakelwa oshimuna okuna okutameka kopolifi opo i ninge omapekaapeko a wedwa po moshiningwanima osho.
“Ngeenge nakuningwa oshihakanwa okuna oumbangi wa yela nowo shili moshiningwanima osho, oha tula mo oshibofa kombelewa yoshilongo ndele ta futilwa ongobe aye ile a pule ongushu pashimaliwa yongobe yaye,” Naikaku ta ti.
Omupopiliko welelo lOngandjera Sakeus Shangula okwa holola kutya ovakwashiwana itava vake ashike eengobe ndele ova kwatela mo paife noikombo unene nene eendongi.
“Otuna oshiwana sha nyonauka koulunga. Onghene ohatu indile oshiwana shi xulife po oumbudi woimuna yavakwao,” Shangula ta ti.
Shangula okwa indila ovakwashiwana va kale vena oushili nokutoolifa ko vakwao ngeenge va mono oimuna yavakwao.
Okwa ti eengobe mOshiwambo odi lile po unene okukwafela poitufi yonhumba kutya epeehango ile peefya.
“Okulandifa po ile okudipaya oshimuna shamukweni ngaho owe mu etela ashike oluhepo,” Shangula ta ti.
Omupopiliko wopolifi, Deputy Commissioner Kauna Shikwambi okwa holola kutya omulumenhu weedula 30 okwa tulwa moipandeko eshi vati a shinga eengobe daxekulu koufita ndele teku di landifa po komunangeshefa wokapana Etitano. Otaku hokololwa omufekelwa a shinga eengobe okudja kOmutsegonime ndele teke di landifa momukunda Okanenge mOndangwa.
Opolifi oya hanga nale eehove nhee ta dipawa, va hanga ovanhu tava yuvu. Eehove da dipawa odina ongushu yoshimaliwa shi fike poN$48 000.
Opolifi moshitukulwa shaKunene oya tula ovalumenhu vanhe moipandeko shinasha nedipao leengobe tadi tengenekwa dili po51 mOutjo omwedi ou.
Otaku hokololwa ovalumenhu ava va shinga eengobe edi meefaalama mbali, noku di shingila moixwa omo va hangika ve di dipaela.