Lasarus Hakwaake
EENHANA – Ombelewa hai ungaunga nomavalulo ovanhu oshoyo omaumbo alushe konima yomido omulongo oye lipyakidila paife moitukulwa aishe 14 yoshilongo tai ningi eenghundafana domoule okufatulula omukalo ou hau longifwa opo ku valulwe ovanhu. Omavalulo aa taa ka ningwa mo2021 oo omavalulo omatine konima oshilongo eshi shamanguluka. Oshoongalele osha kalwa kungoloneya, okamusela voikandjohoololo oshoyo veedoolopa, ovaleli vopamufyuulukalo, ovanambelewa ovakulunhu voilando oshoyo omitwe deembelewa mOhangwena.
Oshoongalele eshi osha li unene sha twa omufindo keenghendabala nghene ovaleli ve na oku udifa ko oshiwana ouwa womavalulo ovanhu oshoyo omaumbo osho hashi dala eemhangela, oshoyo omafaneko oshilongo. Omwaalu wovanhu oo hau yandje kutya oshiwana osha pumbwa omutengenekwafaneko woiniwe ufike peni, oshoyo omaneko exumifokomesho momukokomoko weedula omulongo komesho.
Oshoongalelepukululo eshi osha li sha kwatelwa komesho komukulunhu wombelewa yomavalulo Paulina Enkono, nokwa shoshona kutya ove ya okuyandja omauyelele shina sha nomavalulo ovanhu nokwa indila ovakufimbinga va kufe ombinga va mana mo opo va ete po eshi shi na okulundululwa opo omavalulo ovanhu a ka ningwe noupu. Okwa lombwela yo ovakufimbinga kutya oshitukulwa keshe oshi na okukala sha tula po okangudumutima oko taka kala nokuungaunga nomapukululo, elongo oshoyo okutwa ovanhu omukumo. Okwa popya vali kutya omavalulo modula tai uya itaa ka ningwa vali paembapila ngaashi sha kala omukalo waikililwa ndele otaku ka longifwa oukompiuta vopeke.
Okwa holola kutya okuninga omavalulo ovanhu oshinima shi na ondilo nokwa pula oikondo yepangelo oshoyo yopaumwene i kale ya yambidida nakeshe eshi shi li po opo va shakeneke epangelo pokati. Okwa popya yo kutya omavalulo otaa ka pula ovanailonga ve fike 11 500 oshoyo omatuwa e fike 2400 opo ku kale kwa valulwa ovanhu aveshe moshilongo. Omafaneko omaumbo noku etapo oualita vomavalulo otashi ka tamekwa muSepeteba odula ei.