Uuministeli welongo, uungomba, omaudhano naanyasha owa pititha omushangwa kutya owa tameka nomalongo gwopayitopolwa gomayambindhindho giiputudhilo yopombanda. 

Uuministeli owa shanga kutya owa tameke okugandja omalongo kaalongwa, kaavali osho wo kaalongi kombinga yokuninga omayindilo gokukwathelwa kepangelo uuna ya yi kiiputudhilo yopombanda. 

“Otatu gandja wo omalongo kaalongwa kombinga yaashoka taya pumbwa opo ya vule okuyambindhindhwa kepangelo osho wo oompito dheyilongo ndhoka itaadhi ya kalitha pevi konima yeyilongo,” ya shanga ngaaka. 

Oya fatulula kutya oye ya po noprogalama ndjoka okuyambindhindha aalongwa ya kale ya patuluka kwaashoka ye na okuninga uuna ya mana osikola. 

Uuministeli owa gwedha ko kutya shika otashi ka kwathela aalongwa ya vule okuhogolola shoka ya hala okuilongela manga kuna ethimbo oshoka oyuuviteko shoka shili mondjila naashoka kaayena oku kutha. 

“Omalongo ngaka oge na wo aanambelewa ya yooloka ya za kiiputudhilo yopombanda osho woomahangano gena sha nomayambindhindho gaanasikola ye li kiiputudhilo yopombanda,” ya shanga ngaaka. 

Oya ti omalongo ngoka oga tameka momasiku omugoyi gomwedhi nguka notaga hulu momasiku 19 gamalitsa nuumvo. 

Omalongo ngoka anuwa oga tamekele koshitopolwa shaKavango West notaga ka tsikila koshitopolwa Kavango East sigo Zambezi. Oosikola ndhoka dha tamekwa nadho ongaashi osekundosikola Kandjimi Murangi, Nkurenkuru Combined, noKahenge Combined. 

Aalongi naalongwa koosikola ndhoka oya li ya holola euvo nawa sho ya etelwa omalongo ngoka poosikola dha wo taya ti otashi keya kwathela okulongekidha oonkalamwenyo dha wo uuna ya mana oondondo dha hugunina. 

Aalongi oya ti omalongo ngoka otaga gandja ethano ewaanawa kaalongwa, oshoka ohaya kala yuuvite shoka yena okuninga sho yuuka kiiputudhilo yopombanda. 

-vkaapanda@nepc.com.na