Abraham Mwanyekange
Johannes Martin omukalimo womOndangwa nokwa li nale kansela womodoolopa, okwa ti okwa shangela kelelo lodoolopa opo li lukile vamwepo vomomapendafule odoolopa.
Martin okwa ti nonande pefimbo a li kansela ina pula nokutulifa moilonga eluko lomapandavanda ota ti omanga eli omukalimo oku na oshinakuwanifa okuyandja omayele keleloodoolopa. “Ekwatafano letu nelelo oli li nawa, noluhapu ohava dulu okuufana nge poitufi yomaluko omapandavanda,” ta ti. Martin okwa yandja omadina aavo a tala kutya ova wana okulukilwa omapandavanda, omadina ongaashi omweeti woihokolola komhangu Justine Ndapandula Shiweda, Dr Happy Musweu oo e li nakutotapo oshipangelo shaNdangwa shopaumwene, omunangeshefa weengeshefa doThree Sister Mall Fenni Nanyeni, naAndimba Panduleni Naftal oo a li nale mayola wOndangwa.
Justine Ndapandula Shiweda, Arumugan Thambapilai, Dr Happy Musweu naAndimba Panduleni Naftal ovahulako nale.
Ovakalimo vomOndangwa vamwe ova twa kumwe naMartin. Omunangeshefa Aina Nangobe okwa ti osha fimana opo ovo va longela odoolopa mouwa va fimanekwe nomadina avo a shivike komapipi taa uya, Nangobe okwa ti ota popile opo nakufya Justine Shiweda a lukilwe epandavanda molwaashi okwa ulika kutya oulingilingi nombubo kaiwa. “Ondi wete otashi kala efano liwa ngeenge edina laye tali ka kalekwa po l ihangike po nokomapipi a landulako,” Nangobe ta ti. Shiweda okwa hulifa konima eshi a ponokelwa nokutilwa omeva oudio kovalumenhu. Seblon Andreas okwa ti ovanhu nava fimanekelwe oilonga oyo va longa nonghee oku wete shi li mondjila opo va lukilwe omapandavanda. “Otu na mo omapandavanda amwe a lukwa omive, lipula nee ngeenge omiti otadi lukilwa, ovanhu ovo va ninga shike?”, ta ti. Andreas okwa ti ita popile ashike ku lukululwe omapandavanda, ashike okwa hala oo mape oo a lukilwe omapenda. Umwe oo ina hala edina laye la tumbulwa okwa ti Dr Happy Musweu okwa longa shomupondo unene okumona kutya Ovandangwa va mona epango lopombada unene olo lapumba mo modoolopa, ta weda ko ta ti omunangeshefa Fenni Nanyeni okwa eta po eemhito doilonga novanangeshefa vopedu vahapu otava ngeshefele monhele yaye yomangeshefelo osho ta ti osha xumifa komesho eliko lodoolopa pombada. Maria okwa ti ye ita yi moshipala omafaneko, ta ti okuwete kutya nakufaneka okwa nongonona nawa efaneko laye. Omunambelewapitifi wOndangwa Ismael Namugongo okwa ti oshiwana osha manguluka okweeta omafaneko asho mwa kwatelwa nokuluka omapandavanda omodoolopa, Namugongo ota ti omaindilo oludi olo ohaa kalelwa nee kokangudu ke na sha neluko nomapandavanda no konima okangudu ohakayandje nee omayele kookansela vodoolopa opo kuningwe nawa omatokolo. *Edina Maria olalongifwa ashike.
-abbenghilai@gmail.com