Abraham Mwanyekange 

OSHAKATI – African Stars nEeshoke Chula Chula ova dana 0-0 Olomakaya mOshakati Independence Stadium medingonoko eti-27 loNamibia Premier Football League. 

Manga oudano inau tameka enyakwa African Stars yaWindhoek , oyo yali ili pombada yo NPFL noitwa 50. Eeshoke Chula Chula odali poutivali noitwa 49. Konima youdano wavo eshi ve lifiya ofika, Stars oye lishuna koluti noitwa 51, omanga Eeshoke da ya poitwa 50. Ope na ashike oshitwa shimwe pokati kavo vo aveshe ova hala okuvena po-NPFL oko kwa fyaala ashike omaudano atatu olixa ikale yaya pehulilo.

Okapale koIndependence okwa  li kahada ka fa ofenya kovayambididi vespana dopavali. Ovayambididi ova kala nokwiimba omaimbilo nokutanga eespana davo manga kwa li va teelela 16h30 i fike opo pa tameka oudano waChula Chula noStars ovo ve keli fiya ofika konima yominute 90.

Omudeuli wEeshoke Chula Chula okwa ti okwa mbilipalelwa koidjemo yavo noStars. “Onda kala nale nde shi teelela unene tuu eshi ndi na ovamati ava vehe na eshiivo la wana lihapu ngeenge tashi ya ko-NPFL,” John Sikerete ta ti. 

Sikerete okwa ti mopaife ova tala koudano wavo noKhomas Nampol opo va ka tale enongo nge taa fe ongobe nonande okwa ti itashi ka kala shipu. Etimwaumbile laChula Chula okudenga Nampol ye ta i kuNgulungulu opo oPalace yidengemo oStars, nongeenge oinyanekwa oya shakene nomutenya nena otashi kala onghundana iwa kuye. 

Omudeuli woAfrican Stars Agnus Elemu okwa ti ove shi shi kutya oudano wavo naChula Chula itau kala upu unene eshi va danena mokapale kaye oko haka kala ke hadi ovayambididi vavo. Elemu okwa ti okapale kaShakati kake li naana pamufika wopombada. “Otwa lundulula okudana kwetu molwonghalo yokapale naasho shimwe she tu kuma moudano ou,” ta ti.
“Ashike itatu shuna omutwe moipeta, ohatu ke lilongekidila o-KK Palace tu mone oitwa yetu itatu molwaashi oya fimana kufye,” ta ti. 

Oidjemo ikwao yomOlyomakaya; KK Palace 1-2 Khomas Nampol, Eleven Arrows 0-2 Young African, Blue Waters 0-2 Tigers, UNAM 1-0 Okahandja United, Mighty Gunners 2-0 Julinho Athletic, Life Fighters 1-0 Rundu Chiefs.

Ovashiivi nawa mokatanga kokeemhadi ova tala kutya otashi dulika omufindani wekopi a ka monike moudano waxuuninnwa wolixa konima eshi kwa shaala ashike omaudano atatu.  -abbenghilai@gmail.com