Aanafaalama yomomapya oya ti nonando ya nyanyudhwa komuloka omwaanawa sho ya ningi omimvo ya taalela ondjala, okapuka oka ponokele iikunomwa nokuyonagula omapya gawo.
Ookansela ya yooloka yokiikandjohogololo mbyoka ya ningi iihakanwa yokapuka miitopolwa yokonooli oya fatulula kutya okapuka hoka oka nika oshiponga ko ohaka li oshilya taka endelele unene ethimbo lyuusiku shi vulithe ethimbo lyomutenya.
Taya ti, okapuka hoka ohaka kala unene momapya ngoka ge na iilya iitalala.
“Okapuka kake li momikunda adhihe, ihe mpoka ke li oke li po lela okendji, ashike ngashingeyi momikunda dhimwe oka za mo, konima omapya ga tsininwa,” ookansela ya popi ngaaka.
Kansela gwaKalongo Laurentius Makana Iipinge okwa ti okapuka oka li ka lopotwa momukunda Omuthitugwonyama oshiwike sha zi ko, ashike ngashiingeyi ke na natango uuyelele kutya omagumbo ge thike peni ga ponokelwa.
“Otwa lombwele omagumbo ge na omapya ga lika iilya gi ilopote tse tu vule okulopotela ombelewa yuunamapya yi ka tsinine,’’ ta popi ngaaka.
Kansela gwOshakati shokuuzilo Abner Shikongo okwa ti, oya ningi onkamabadhala yomeendelelo konima ya lopotelwa okapuka.
“Otwa li twi ithana aanambelewa yuunamapya mboka ya li ya tsininine omapya, ihe ngashiingeyi okapuka kake mo we moshikandjohogololo ashihe,” ta popi ngaaka.
Kansela gwoshikandjohogololo Ompundja Adolf Uunona okwa ti okapuka oka li iilya momudhingoloko gwawo.
“Aanafalama oya dhengwa pomutima, oshoka omapya gawo oga lika shi nyanyaleka, shoka tashi yemateke. Okwa li ya inekela okumona iilya nuumvo oshoka omvula ya zi ko inaya mona iilya ya gwana omolwoshikukuta sha li ko,” ta popi ngaaka.
Aanafaalama anuwa oya kala nokugalikana opo omvula yi loke neyinekelo kutya pamwe taka hiti mevi oshoka ngele ka hiti nena oka ya.
Secilia Andreas gwomomukunda Oshipumbu shOmugongo moshikandjohogololo Ompundja okwa ti epya lye olya lika kokapuka noonkondo.
“Otandi pandula ngaaka oshoka inali lika po alihe, ashike ngeno nuumvo mepya lyandje omwa za iiya oshoka ond lli nda longa,’’ ta po pi ngaaka. Rosalia Amupolo gwomomukunda Oshakati shaPinihas moshikandjohogoolo Omeege okwa ti nonando epya lye okwa li lya ponokelwa kOkapuka, mgashingeyi oka ya.
“Otatu pandula omolwaanambelewa mboka yali ya yamukula meendelelo nokutsinina okapuka hoka ka ze mo momapya getu,” ta pandula ngaaka.
Maria Nelenge gwomomukunda Oshandumbala okwa ti okapuka mepya lyawo oka ningi mo oshiwike, ashike oka lya mo nawa ke ya thiga pomutenya.
“Nonande okwa li tu na omukumo kutya nuumvo otatu mono iilya iihwepo oshoka otwa longele nomvula oya loka nawa, shika she tu teya nduno omukumo. Oomwenyo dhetu odha tunda nonande tatu kalikola ngaa mboka tu wete po oshoka ohawu hiti kohi yomafo,”Nelenge ta ti ngaaka.
Okapuka otaka hanagula omapya momikunda dhimwepo miitopolwa Ohangwena, Oshana Omusati oshowo kOZambezi.
Omupoliko muuministeli wuunamapya Simon Nghipandulwa okwa ti Okapuka okaponokele omapya monooli, nuunene okahanagula omapya koZambezi.
“Aanambelewa yuunamapya miitopolwa oya yakula mbala kehe mpoka pwa lopotwa okapuka noya ilongekidha ethimbo kehe okuyambidhidha oshigwana,” ta ti ngaaka. Ta gwedha po kutya uuministeli owu na omiti dha gwana okutsinina omapya ga ponokelwa kiipuka tayi hanagula omapya.
Okwa kumagidha wo oshigwana shi lopote mbala uuna sha mono okapuka momapya gawo, opo shi yambidhidhwe sho shi kwatele po iilya yasho.