Omasiku omugoyi getikombinzi moopate dhaNamibia …Yahetatu ya si, 96 ya lemana miiponga 72

Home Kundana Omasiku omugoyi getikombinzi moopate dhaNamibia …Yahetatu ya si, 96 ya lemana miiponga 72
Kundana
2023-12-132024-10-09By Staff Reporter
Omasiku omugoyi getikombinzi moopate dhaNamibia …Yahetatu ya si, 96 ya lemana miiponga 72

Ethimbo lyomatango omanene nuumvo inali pitila nawa sho aantu yahetatu ya hulitha, no96 ya lemanene miiponga yomoondjila yi li 72, mbyoka ya holoka po muule womasiku omugoyi ageke. Omupitithi gwomauyelele mehangano lyomoondjila Motor Vehicle Accidents Funds (MVA), Abner Kaume Iitumba okwa ti okuza momasiku gatatu sigo omasiku 11 gomwedhi nguka, moondjila omwa holoka iiponga oyindji.

“Aantu ye li 96 oya li ya ehamekwa, niiponga yi li 73 oya holoka, omanga oomwenyo dhaantu ye li yahetat, odha faalelwa miiponga mbyoka,” ta popi ngaaka. Ta ti, oshiponga oshitalala osha ningwa ashike mehuliloshiwike, sho okanona ka si pethimbo lyoshiponga sho ka lyatwa pamwe nayina.

Oshiponga shika osha ningilwa  moshitopolwa shaHangwena. Iitumba okwa ti iiponga yomoondjila otayi indjipala kehe esiku, onkene otaya kumagidha aahingi yiihauto oshowo aayendi yokoompadhi ya kale ye li uupathi uuna taya longitha oondjila. “Ondjila otayi longithwa kaantu ayehe, onkene oshinakugwanithwa sha kehe gumwe, okugwanitha po omandhindhiliko gomoondjila  nokuyanda iiponga yombaadhilila,’’ ta kumagindha ngaaka.Ehangano lyo-MVA, okupitila kepandja lyawo lyomalungula olya li lya shanga kutya, uuna oshiponga sha holoka moondjila, kehe gumwe okwa manguluka okudhenga konomola yopolisi 10111 nenge MVA 0819682.

Opolisi yaNamibia nayo oya kumagidha wo oshigwana kutya, mboka taya ka talela po aakwanezimo yawo kiitopolwa ya yooloka, naya longithe nawa omandhindhiliko gomoondjila okuyanda iiponga hayi holoka unene pethimbo ndika lyokili.

Ondjayi yetanga lyopolisi Joseph Shikongo okwa li a kumagidha aahingi yiiyenditho kaaya hingilile, yo kaaya hinge ye li kohi yomalovu nenge ya loloka.

“Omimvo dha piti, pethimbo ndika lyomatango omanene, oyendji oya kanithile mo oomwenyo dhawo, ihe olundji ohashi holoka kokwaalandula omadhidhiliko gomoondjila,” Shikongo ta ti ngaaka. Ta ti, okuhingilila itaku ti okuthika. Nonando to hingi kashona owu na okuthika ashike, omolwegameno lyoomwenyo wa humbata mohauto yoye oshoyo dhayakweni ye li wo moondjila.

Shikongo okwa ti opolisi yaNamibia oshilongo ashihe oya ilongekindha okulwitha iimbuluma pethimbo ndika, onkene itaya ka pitika nando omuntu taka konda nenge taka yonagula oompango adhihe dha tulwa po.

vkaapanda@nepc.com.na