OSHIKUKU – Eshi efimbo lokukonga ofikola unene mOndondo onhihetatu lafika, ovadali nounona ova tameka nale oku nangala peefikola moutalala wameme-meme tava kongo eemhito detambulo.
Omaandaxa oshivike eshi ovadali ovali va ngudumana poNuuyoma Secondary School mOshikuku, tava kongo eefooloma domatambulifo. Vamwe vomuvo otava ti momukweyo ove ya mo mOsoondaxa efimbo lomutenya, ndele tava nangala mo, vamwe oufiku okudja pee20h00, navakwao opo 03h00 yokeengula.
Ashike nande veli tetuka ngaha, ovadali ava va dja koitukulwa ya yooloka inava mona ekwafo, otava nyenyeta kutya osekundofikola yaNuuyoma otai longifa oulingilingi mokuyandja eefooloma.
Pefimbo Kundana a talela po osekundofikola oyo, okwa hanga ovadali ve li momukweyo momutenya va teelela okupewa eefooloma.Vamwe vomuvo ovali tava ulike omunwe umwe womukeleli womaliko oo vati ta landifa eefooloma kovanhu vamwepo ashike ovanhu vamwe iteva pe. Ova hokolola tava ti ova hala okutambulifa ounona vavo mofikola oyo molwashi oina omuhandjo wondodo onhi-8 yoo ohai pitifa nawa ovanafikola. Umwe womudali a dja komukunda Oikokola okwa hokolola ta ti okwa dja keumbo lwopotundi 04h00 yongula.
“Onda enda oshinano shile okudja kokule ashike onda ninga efimbo lile ndi li momukweyo. Ovanhu ashike vamwe tava pewa eefooloma,” ta ti.
Omudali umwe okwa ti okwa nangala poshivelo shofikola nelalakano okukonga omaindilo ofikola ounona vaye vavali ashike ina pewa ofooloma.
“Opo nda nangala poshivelo apa nokakumbafa kange. Okwa li ondi na omukumo ngeenge ohandi pewa ofooloma ashike ovanhu otava longifa oulingilingi,” ta nyenyeta.
Okamatyona keedula 14 oka ti oka dja keumbo potundi 06h00 ke uya okukonga ofooloma opo ka ninge omaindilo.
“Onda hala okufikola mosekundofikola Nuuyoma molwashi oi li popepi nomukunda wetu,” ta ti. Omukulunhufikola posekundofikola Nuuyoma SS ina hala okupopya naKundana pefimbo omutoolinghundana kwa li aya kombelewa yaye. fhamalwa@nepc.com.na