OHANGWENA – Omunashipundi moshitukulwa shaHangwena e kwetele oumadano okulotoka komesho Simon Kasheeta okwa ti ovanafikola otave shi endifa nawa momaudano okulotoka notaa ende nawa pehe na omashongo. 

Okwa yelifa ta ti paife ovanafikola otava kufa ombinga momaudano okulotoka tava ningi omakondjifafano pamufika woikandjohongo yavo. Okwa didilikwa oitukulwa ya yooloka ye lipyakidila nokuninga omaudano okulotoka omo ovanafikola tave lilongekidile oku ka kondjifafana navakwao. 

Ovanafikola ve li meendodo dopetameko naava ohava kufa ombinga momaudano okulotoka tava fiyafafana novanafikola vepupi lavo. Okwa ti oikandjohongo ngaashi Ongha osho yo Endola oya tameka nale okuninga omafiyafano okutondoka Etitatu. 

Kasheeta okwa weda po ta ti onghela oshikandjohongo ngaashi Oshikunde osho yo Ohangwena nayo oya tameka okuninga omaudano okulotoka notaa kondjifafana. 

“Mongula okwa teelelwa eefikola da yooloka natango tadi ka tameka nokukondjifafano moudano wokulotoka,” ta ti. 

Kasheeta okwa hokolola ta ti konima ngeenge ovanafikola ova mane omafiyafano opomufika woikandjohongo otava ka twikila nomakondjifafano koitukulwa ya yooloka. 

“Ohatu ka tala kutya ovanafikola velipipo tava dulu oku ke tu kalela po koitukulwa ya yooloka. 

Ohatu ka tuma ovanafikola ovo ve li omakoma dingi mokulotoka,” ta ti. Kasheeta okwa ti osha fimana opo ovanafikola ve litule mo ngeenge tava ningi omaudeulo okulilongekidila oku ka kondjifafana navakwao. 

“Ohatu lalakanene opo oshitukulwa shaHangwena shi findane omafiyafano okulotoka moshilongo,” ta ti. 

Okwa weda po ta ti otashi ulike efano liwa ngeenge mOhangwena tamu di ovanafikola tava ka kalela po Namibia komaudano okulotoka kondje yoshilongo. 

Okwa kumaida ovahongifikola keefikola da yooloka ovo hava kwatele omaudano komesho opo va xwaxwameke ovanafikola ve litule mo. 

“Omaudano okwa fimana kovanafikola shaashi oha eta ovanafikola va hangane pamwe nokukala vena oukumwe osho yo okushivafana novanafikola va dja keefikola,” ta ti. 

-fhamalwa@nepc.com.na