Ka ku na ondunda kai kayora, otjikando tji ondunda ndji mai yoro oya Pukiro mena rosikore yayo yokombanda indji Opos 3 Senior Secondary School, momambo yarwe osikore yokombanda.
Oyo ndja yandja omutongatima kovature va Pukiro na indwi orukondwa orunene rwa Maheke moupapi nouparanga waro tjinga ena rayo ari ri momana omatenga omurongo wokombanda mozosikore nḓa ungurire nawa mehi momarorero wombura ndja zuko. Oyo tji ya kambura oruveze orutjaine mozosikore azehe mehi.
Oministera yOmahongero wOmbutiro, Omamemeno, Omitanda, Omanyando nOmbazu, Sanet Steenkampa, Oritjavari tja tjiukisire omaunguriro wovahongwa, pozondondo azeembari nḓa, ozo mehi nḓeri ozondondo ozosenina poo zokombandambanda pondondo yozosikore, pari otjiṋa tjimwe tji tjari ongahukiro. Otukondwa twi mozokombanda mu tu turira poo tu tu tjiukwa, kutja tjinene omu mu turira ozondekurona zOtjiṱiro Otjindjandja, otjotukondwa mu ve kondjisira ehupo nezumo okutuurungira mouṱuta, kaatu tamunwa pu pe ṱa pi momatamunino wokuyandja ohange poo outongatima kovature vato. Tjinga oto mouparanga wehi atu ri otukondwa okatihe komaunguriro womarorero wovahongwa momahongero ake rarera kutwo. Mokatihe inga, Omaheke ai ri poruveze orutjamurongoi na tuvari (12) motukondwa atuhe o-14 mehi. Nduri oruveze ombura ndja zuko wina pu rwa ri. Pu mape hee kutja kanaa ya nyinganyingire kaparukaze. Ngunda Otjozondjupa atji ri poruveze orutjamurongo na rumwe (11), Omaheke orutjamurongo na tuvari (12) na Kunene porutjamurongo na tutatu (13) ngunda okatihe aka rararere kOrukondwa rwa Hardapa.
Ovahongwa va mwine ozondjambi pekekepe mokuungura nawa movirihingwa pekepeke na mozondondo pekepeke ovahongwa mbe hungira Otjiherero muwo mbari ovaheṋa tjinene kakarukaze tji ve ri mo.
Tji tjiri otjiṋa tji matji sokutja tja umanisa kangamwa ondekurona. Posi ya tji kweya kokutja tjii hapo ozosikore omurongo ozondenga mehi pondondo indji yovirihongwa vyondondo yokombanda momananeno wosikore, Osikore ya Maueuozonjanda ai tamunwa. Nu ka ku tamunwa uriri nungwari ama ku zu ye ya otjaine mozongwawo omurongo zokombandambanda mehi. Oruveze orutenga pe nosikore indji Oruronga yovapoṱu mOkavango kOutjiro; oitjavari ai ri Onawa ya Musati noitjatatu ai ri Eengendjo ya Hangwena.
