Omaraisiro wovatjite vomaningiriro ngu mave rihekene nokupaha kOtjombanguriro tjOkombanda tja Tjomuise, kutja imbi ehi rOvandoitji mbi ya tjitire oruveze rohuurire ya Namibia, yari Otjiṱiro Otjindjandja nu ku nao Ehi rOvandoitji ra sokusuta Otjisuta, katjiṋa tji matji sokutjitwa ngunda ehi ndi orini ari he ri po.

Mu nao imba mba hitisa otjiposa tji, Bernardu Swartbooi, nguri omutenga nOuhonpaare wOmbazu wOvaherero otjoutjavari, owo pu wa hitisire omaningiriro kOtjombanguriro kutja ehi rOvandoitji   wina riweziwe ku imbo varwe mbu mave sokuzirira kotjiposa tjo. Mberi omutenga nguri Omuhaamise wOmbongarero yOtjiwaṋa noutjavari mombongarero ndji oini nu outjatatu Opresindenda outjataine Okambineta noutjatano Ohahende yOhoromende.

Pendje nEhi rOvandopitji wina kotjiposa kwa ningirwa kutja Otjirata tjOvanane vOmbazu na wina ovirata pekepeke vyomauhonapare wombazu,   vi zirire kotjiposa itji ndoovazu mavi zeri nao. Pendje na imbi mbye rikwamba rukuru kotjiposa itji tji tja hitisiwa motjombanguriro mo-2023. Pendje nOuhonapare wOmbazu wOvaherero kehi yOmbara Otjitambi Mutjinde Katjiua, omengi ngeri omauhonapare wombazu wOvakwena tjimuna wOvafrikanera, !Mana, Bondelswartsa na varwe. Tji kweya ku imbi nai mbya ningirwa kotjombongarero okuzirira kotjiposa tji mavi vanga  nungwari ku ku he ri okurikuta kutjo otjokuyandja oruvara poo okurira orupa rwatjo otjozondekurona wina tjinene nḓa yara nokunyengwa Onḓuvasaneno yApamwe, ndjiri Ojoint Declaration, ousupi OJD, mape munika ayo okuza motukondwa tjiva uriri tjimuna Oshikoto ouhonapare wOvandonga; Omaheke ku ku nOvambanderu kehi yombara Tjozohongo II Nguvauva na wina Ombara Tjinaaṋi Maharero wOtjikatjamuaha, Erongo pendje nouhonapare wOmbara Manasse Zeraeua ouingi warwe mburi wOvaṱakume; Okunene, Otjozondjupa  na khomasa na !Kharasa ku make tamunisa Ouhonapare wa Hozutjikuze. 

Omauhonapare ayehe nga ndoovazu maye vanga okurikuta kotjiposa maye sokuzirira keningira indi moure womayuva yane okuza komaitaverero weningira indi nu tjazumba wina kombunda yomayuva o-21 aye hitisa ouhatoi wawo motjombanguriro.  Ngunda otjiposa otjini atja tyewa kutja matji puratenwa oure womayuva yevari mu Seninaṋi ombura ndji.