ONGWEDIVA – Omauliko giipindi gaNgwediva ngoka ga tamekele mehuliloshiwike sigo oompaka otaga ende nawa.
Aashingithi ya yooloka mboka ya yi moonkundathana noshifokundaneki shika oya ti oongeshefa dhawo momauliko giipindi otadhi ende nawa. Okuza esiku lyotango oya kala ye na omukumo kutya omasiku ngoka ga hupa ko otashi ka enda lela nawa.
Selma Nuukushi ngoka ta landitha iikulya yOshiwambo okwa ti, ookasitoma ohadhi ende unene komatango, ngele oyendji ya zimbuka.
“Ethimbo ndika lyomutenya ookasitoma ohadhi ende kashona. Ashike esiku pomweelo ka kwali ta pu futwa otwali twa landitha nawa, ashike otuna omukumo gwa pama sigo ompaka,” ta popi ngaaka.
Ta hokolola kutya okuza esiku lyotango e ya momauliko giipindi gaNgwediva, okwa landitha oshimaliwa sha kola, shi vulithe shoka ha landitha kehe siku kehala hoka ha landithile shito okuza Omaandaha sigo Olyomakaya.
Martha Amutenya ngoka naye ta landitha iikulya yOshiwambo okwa ti omauliko giipindi ogo ashike taga longithwa kaalandithi paife, oshoka olyo ethimbo aantu ya gongala mengathithi pehala limwe.
“Komahala getu hoka hatu landithile kaku na we ookasitoma. Oongeshefa nkene dha yile nocorona, odha nyengana okugalukila kondjila,” ta popi ngaaka.
Ta ti ohaya landula ashike mpoka pe na omauliko giipindi, opo ya vule okulanditha.
Ta gwedha po ta ti, onkalo yongeshefa oya lunduluka, oshimaliwa kashi mo we moshigwana, otashi kongwa nuudhigu. Mayola gwaNgwediva Taarah Shalyefu okwa ti sigo oompaka oshigwana otashi gandja lela elongelokumwe.
“Iimbuluma inayi holoka sigo onena, onkene elelo lyOngwediva otali pandula aakwashigwana ayehe molweyihumbato lyawo lyonawa, nasho tali tsikile okwiihumbata nawa,’’ ta pandula ngaaka.
Opolisi ndjìoka hayi gandja olopota kehe esiku kombinga yiiningwanima tayi holoka moshitopolwa, inayi lopota sha oshiwinayi sha holoka.
Nonando pwa kala omayikwatopomutima kutya omauliko giipindi ohaga etelele wo natango aafuthi oshowo iikwawo oyindji, inapu ya sha oshiwinayi.
Opolisi mOshana oya ti, otayi tsikile okulonga nuudhiginini, unene pethimbo ndika opo yi keelele iimbuluma yi holoke.
Shoka sha pumbiwa ombili, elongelokumwe nokunyakukilwa pamwe.
-vkaapanda@nepc.com.na