Taimi Haihambo 

Ovakalimo melelo lodoolopa yaHelao Nafidi ova holola enyeme lavo shaashi omafiku okuninga omaulikilo oipindi a shunifwa pedu okudja pomafiku omuwoi fiyo puatatu.Ovaunganeki novakwatwelikomesho yoipindi ova ti eshi sha eta omafiku a shune pedu osheshi vati odula ya dja ko va li va taalela omashongo oo a kwatela mo elongifo loshimaliwa sha pitilila, osho va hala okukondolola neudo. 

Selma Kapembe oo e li mokomitiye yokukwatela komesho omalongekido aa okwa ti natango ova tala kelongifo loinima ngaashi olusheno, omeva osho yo oinima yomalihafifo ei hai kala ya etwa mo i na ondilo. “Oinima ei ohai pula oshimaliwa shihapu unene, osho sha etifa omafiku a kale a tetwa ngaho,” Kepembe ta ti. 

Tangi Lucas oo e li omukufimbinga momangeshefelo oludi eli okwa ti ye eshi she mu vela osheshi kutya omafiku okwa shunifwa pedu, ashike ondado yokulishangifa inai shendja sha. 

“Fyee ava otwa hala okukufa ombinga mokulandifa oikunwa noikulya otwa pulwa tu fute N$1 100,” ta ti. 

Omangeshefelo opedu vati okwa pulwa N$500, omanga ee-VIP da pulwa N$4 500. 

Vissarina Shiwana oo naye e li omukufimbinga mokulandifa okwa tumbula kutya ye ke wete ta kufa ombinga. 

“Ame onda tila okuteka oindilafomwa yange shaashi omunhu owa teelela ashike u ka lande oinima, ndele tai kala inai pwa po shaashi omafiku omashona,” ta ti. 

Nonande ovakwashiwana tava yandje omakemo avo ngaho, vokoHelao Nafidi eenyala ove di dika medu. 

Ova ti omalishangifo otaa pula komesho, nefiku laxuuninwa inave li tonga natango. 

Kapembe okwa ti omauliko opaipindi otaa ka tameka mo31 yaKotoba fiyo 3 Novemba 2025. 

Okwa ti yo ou te ya okuyeulula oshivilo pambelewa Omupresidente waNamibia, Dr. Netumbo Nandi Ndaitwah. 

-Taimihaihambo2000@gmail.com