Omaumbo 30 a dikwa neembungu okwa pya po filufilu oshivike sha dja ko kofaalama Komsberg moshikandjohololo Ariamsvlei.

Kansela woshikandjohololo shaKarasburg shokushilo, Anseline Beukes okwa ti omudilo owa etwa komuendanandjila oo a ufila ekalo popepi nonduda imwe ndele omundilo ta u kwatafana nomaumbo aeshe omilongo nhatu. Omunaendandjila vati ina ninga oshiningwanima eshi owina na kali eshi ngeenge otashi eta epeya.

“Kakele koipumbiwa yomomaumbo ngaashi oipundi, eembete, oitaafula nosho tuu, oikutu noikulya, momaumbo omwa pila yoo omaufemba ngaashi oumutwe, eedjapo domadalo, noukalata vomahoololo,” Beukes ta ti.

Nonande omundilo wa hanauna po omaliko ovanhu vahapu, Beukes okwa ti ina u twaalela nande omwenyo womunhu umwe. 

“Ombelewa yange mekwatafano nombelewa yomupilima oya kwafela okuyandja oikulya kovakwashiwana va kanifa omaliko avo moshiponga eshi,” Beukes ta ti. 

Okwa ti omakwafo a yandjwa koonakuninga oihakanwa yomudilo oo pokafimbo ashike, omanga tava ka enda noku konga omatalashe noipumbiwa imwe. 

Kombinga youfemba wa hanaunwa po komundilo, Beukes okwa ti otaka kwatafana neembelewa douministeli woikwameni neameno lokeengamba opo ku yandjwe oufemba meendelelelo. 

Wilma Nghiolymgwa, umwe womwaavo va ninga oihakanwa yomundilo okwa ti okwa kanifila oinima yaye aishe momundilo omo. 

“KoKomsberg onde ya ko hai kongo ouxupilo, ashike paife onda fyaala po ashike noikutu ei ndi na kolutu,” ta ti. 

Oonakuninga oihakanwa yomundilo otava pula ekwafo kovasamaria ovanamutima nghenda ve va kwafele.