Oministeri yOtutumbo nOvikunwa, Omeva nOmatungururiro Wehi ya randa osarama imwe uriri younene woheketara 2,948.
Ngunda ohoromende aya pewa azehe kumwe ozosarama o-13 okutara mo nokuzehaviva komahandurisiro. Ovaparuke vevari okuza mOrukondwa rwa Kunene va handurisiwa posarama Orabelsberg oitja 537 no pOkakondi ku ka sewa pokosarama indji Ovaalwater oitja 283.
Oministeri indji ya pewa Ozondora za Namibia omangete 30 N$ kehi yOmaunguriro wakumwe wa Namibia nEhi rOvandoitji nOruwano rwOkomisi ya Europa okuungura natjo omatungururiro wehi momahi wakangamwa. Oministeri tji i kayendisa pu norutu rwa Namibia ndu konḓonona omaririro wehi onguza, Odesert Research Foundation of Namibia (DRFN), otjoruyandjandunge. Oto nai tu twa uta nOtjikamangarate Tjorupa motjiungura hi i yotjiwaṋa pondondo yatjo komaririsiro wOtutumbo nOvikunwa otjongetjefa potuveze mOkunene tu matu kekwa momahi wakangamwa.
Wina otjorukondwa rouṱuta owo mbu kayendera komeva nombura ndjiri oheṋa koṋa ku ku nourumbu, kwa kara omatoporero wozondjombo, mu mu na wina omatungiro womuriu womeva wounene wozomirimeta o 160 oure wozokirometa hambondatu pokati kOharemba na Konguati. Otjiungura nai tji tjiri pondondo oitjatatu. Matji undjirwa okuvaziza omeva komaturiro wa Kanguati kotjimariva atjihe kumwe tjOzondora za Namibia omangete ape o-24. Tji matji sokuyetwa kotjikoro momayandero womueze mbwi.
Mombii tjingeyo pa kara omaṱunino nomekurisiro otuwondja wotui tjimuna ozondjombo o-21 nḓa toporwa. Omurongo wazo nḓa yeta omeva ngunda ndatu aze ha ri nomeva. Imwe ya toporwa mOkarukondwa ka Puwo komotjihuro poo komoukoto pOsikore ya Tjerunda; ine mOkarukondwa ka Pupa pOkamue, Ombazu, Etara nOvinjange. Ozondjombo hambombari (7) za toporwa mOkarukondwa ka Opuwo Kombanda.
Ndatu mOkarukondwa ka Pupa pOrute, Okamue na Etara ngunda otui twarwe tutatu mOkarukondwa ka Puwo pendje pOtjikoto nopEpupa pOrue nOmuhongo atwa ṱunwa kongaro yakandinondi norutjeno rweyuva.
Imbwi ouṋa ooimba na mbena otja kehungi rombura rOngooneya ya Kunene nda yandjere tji ya ri 16 komueze mbwa zuko.