ONIIPA –Aantu oyendji mOniipa komatango gEtitatu oya thigwa pomutenya sho ombepo onene ya teyagula omatungo mwa kwatelwa omagumbo, oosikola noombelewa. Gamwe gomomamanya goombila momawendo nago oga teyagulwa. Kakele kokuteya omatungo, ehala olya thigwa kaali na olusheno oshoka oopala dholusheno pomahala gamwe odho odha li dha fundulwa mo mevi. Elago enene oshoka oshinima shika oshinene inaashi faalela nande omwenyo gomuntu gumwe. Ombepo ndjoka ya li onene noya uvika kiitopolwaa oyindji konooli oya thigi aanasikola 300 yopOniipa Primary School kaaye na mpoka taya longelwa oshoka iipeleki oya vundhulwa ko koongulu dhosikola. Linea Hafeni Omukalimo gumwe gwomOniipa ngoka gwomwaamboka ya dhengwa ya lila, okwa thigwa pomutenya shaashi, kakele ketungo iinima yomegumbo lye nayo oya hanagulwa po kombepo.
Aantu yamwe ngashiingeyi oya thiminikwa ya tule iinima yawo yomomagumbo poontu oshoka opo manga taya tungulula yo taya tula ko iipeleki mbyoka ya umbwa ko kombepo.