Charles Ndeumane

Kansela gwoshikandjohogololo shaKongo Efraim Shipindo okwa ti ombila moka mwa li mwa fumvikwa yamwe yomoonakulwa aakulu anuwa oya fumvuka pethimbo aalumentu ya li taya fulu omunino gwomenya nomasipa gagumwe gwomuyo oge ya kombanda.

Shipindo okwa ti konima yOosoondaha mbali dha piti aalumentu yamwe yomomukunda Oshambada moshitopolwa shaHangwena oya li taya fulu omunino gwomeya sho ya itsu moshiketha shi na ooholo dhoondjembo, nokonima sho ya tsikile nokufula oya fumvula mo omasipa gagumwe gwomaakwaita anuwa yoPLAN mboka ya li ya fumvikwa mombila ya li mpoka.

“Shi ikolelela komahokololo, pokuma mpoka opwali pwa fumvikwa aakwaita yoPLAN ye li yane ya dhipagelwe kaakwiita yoKoevoet pethimbo lyiita, okokutya mpoka pwa fumvuka omasipa ngoka gomukwiita gumwe opu na yakwawo natango,” Shipindo ta ti.

Ndhoka odha kolekwa kunakulwa omukulu Sackaria Andreas, ta ti pomudhingoloko ngoka opwa fumvikilwe aakwiita oyendji mboka ya dhipagwa koKoevoet pethimbo lyiita.

“Pehala mpoka opwa fumvikwa aakwiita aakwetu oyendji yoPLAN mboka ya dhipagelwe koKoevoet. Aakwiita yoKoevoet oya li haya yi ko nomidhimba dhaakwiita yoPLAN mboka ya dhipaga ndele taya pula aantu pomikunda ndhoka dhomuuzilo wOkongo ngele oye ya shi,” Andreas ta hokolola.

 Komufala gwopolisi moshitopolwa shaHangwenga Ottilie Kashuupulwa okwa koleke kutya omasipa goonakulwa aakulu mboka ye shiwike nawa oga adhika kombanda Oosoondaha ndatu dha piti sho oombila moka ya li a fumvika ya fumvuka.

“Pethimbo ndiya lyiita ndishi aakwiita mboka ya hulitha oya li haya vulu okufumvikwa kaakwashigwana, ombila ndjoka ya fumvuka mOkongo opo omasipa ge ye kombanda oyonalenale pethimbo lyiita ngiika oomvula 34 dha pita po, naamboka ya li ya fumvikwa mo oyamwe yomaakondjelimanguluko mboka ya li ye shiwike nawa,” Kashuupulwa ta ti.

-mrndeumaneraycharles@gmail.com