Omayuva womasuviro nga, ndiri muhuka ngandu kOsondaha tjandje Onational Unity Democratic Organisation, Onudo, ya hara ounane oupe.

Tjinene Operesindenda ombe na wina Omutjangerepo Omunene tjinga imba mbe ri po nai ovaheṋendu Esther Utjiua Muiinjangue na Joseph Kauandenge, ava raisa kutja kave nokukurama okuyaruka movihavero mbi. 

Kauandenge wa yauza kutja avihe vi ri korutenda na korusepa okutoora mbu ma ku zu orueru rotjira, mbe ri ovanane muvyu vokombandambanda mbe ri Operesindenda nowokehi ye; Omutjangererpo nowokehi ye, Omuhaamise (Chairperson) nOmuhaamise mouparanga wehi (National Person), Omuṱize wOmbwiko nowokehi ye. 

Nandarire kutja nai pe na mbe ri raisa kutja mave rarakana ovihavero, kutja otjohi tjOperesindenda nowokehi poo otjohi tjomutjangerepo nowokehi na vyarwe, okokutja owo ngunda va raisa ozonḓero zawo porwe kape nokuheya kutja omayuva womasuviro nga owo ombu mave rire ovararakane poo ombu mave rire ovavarekwa porwe tjinga otja komazeva wotjira ombongarero tji ya haama kangamwa okaṋepo akehe kombongarero ndji ake nousemba wokusekama nokuurika karive. Pu mape hee kutja imba mbe ri raisa rukuru mape ya omayuva womasuviro nga ave ha kara novandu mbu mave ve urike na mbu mave yauza omarukiro poo omavarekero wawo. Nungwari porumwe ape kara omana yarwe kaparukaze.  Okutja ngunda nai otje he ri ongahukiro kutja nguri motjirarakaneno tjotjihavero tjiṋe ouṋe poo kauṋe. 

Kauandenge ma tja otjivepo nai tji matji hingi otjivepo otjiwa tjinene posi ya me rihekene kouṋepo kutja otjo arire tji matji kara pombongarero. Kutja ouṋepo auhe au he ripurire kozonḓero zawo kourike wawo ouini nungwari ozonḓero zotjira atjihe arire nḓa honaparere po.