Ombongarero yo zondekurona azehe zOtjiṱiro Otjindjandja oya kangamua ondekurona aihe iyenene “okurihukura”.
Omuhaamise wOvihavero vyo Mbongarero yOzombara zOvaherero nOvambanderu, wina ndji tjiukua otjo yo zombara za Kadjoze, Ombara Onene Tjinaaṋi Maharero, matja. Na yarukirepo nohepero yombongarero indji. Ama tja oyo kaina ondekurona ma iso okuyesa pehi, ndjiri ongurameno yo zombara za Kandjoze okuroporora okuwoko kuvarue mOtjiṱiro Otjindjandja. Imue yo zongondjero zawo okuyandja omasa kombepo ndja yomutjunikua Uusutuaije Maamberua, nai ndja yenenisirue. Ohoromende nambano Eyuva rOmazemburukiro Wotjiṱiro Otjindjandja tji ya ya kurire. tjiyeri 28 ku Kambundu, otjEyuva rOmazemburukiro wOtjiṱiro Otjindjandja kotjiveta nu wina romasuviro.
Ozondekurona otji ze hasere oku karara no kuundja nunguari okuuta okuungura kutja eyuvandi ri hare omaheya katjotjiri. Mo zo ndiero zo Kambineta ohunga neyuva indi, Oministeri yOmahongero, Ovinangongo nOmbazu “iungurise Eyuva rOmazemburukiro wOtjiṱiro Otjindjandja otje wanise no kuurika otuveze otuhuze pu ma pe yenene oku tungua ozombindi”.
Munao Ombara Maharero otji ma munu kutja otutu tuao tOtjiṱiro Otjindjandja tuute oku ungurira mombii indji. Nu wina oku konḓonona omakuruhungi wOtjiṱiro kutja yeute oku rira orupa rovirihongua mozosikore.
Nḓeri ozongondjero nḓu ma ze hepa ozondekurona azehe oku ya pamue aihe oku yandja oumune wayo. Tjimuna pombongarero yehi, yehi arihe yo 2018 ovananḓero avehe mehi mu vayandja oumune wawo. Mu mwaza ongutiro yehi rotjizeero yOkomisi yaro ndja zikamisiua iyOmutjunikua omuyaruke Hage Geingoba.
“Ngatu kotoke pamue po conferenca indji tu yenene oku tara kutja oviwaṋa imbi ma tu yeta pamue. Omundu nguheri poconferenca indji we ri patere omuni pendje mOtjiṱiro Otjindjandja kena kuhepa oku ka blama (okuyandja ondjo) ohoromende poo ovandu mbu ma ve kayendisa otjina ihi,” Maharero matja. Eye watjere nao mOmaruru omayuva womasuviro ngazuko po ma yambero oyetja 98 wErapi rOtjizemba.
Ngunda aperi nao ma pe zuvakua ayo Onduvasaneno Yavehe pokati khoromende ya Namibia no yEhi rOvandoitji katjisupi ma i tjivisiwa kutja yamanuka. Nu ndoovazu otjotjiri hapo kapena kuya ozondando zoo Maharero novakuao azerire omungandjo?