Ombongarero onene yOvahereo okutya Otjisuta tjOtjiṱiro Otjindjandja mai haama okuza mOmandaha ndi mari yende ngandu tje ri etenga komueze mbu mau yende, Seninaṋi, eyuva komurungu weraa rOngenerara Lothar von Trotha.

Oyo ndji mai tjiukwa otjombongarero yOvaherero yOtjisuta mai haama kehi yOuhonapare wOmbazu wOvaherero wOmbara Otjitambi Mutjinde Katjiua. 

Nembo ehongenekwa ndi mari tja: Ombongarero Ondenga Youye Ohunga nOtjiṱiro Otjindjandja tjOvaherero: Ozombura o-120 Zokuhuka Ominyo Norukondjo, ombonagero indji ndji mai haamene mOtjozondjii, ya tandwa kutja oyouye auhe mokutja mai yeta pamwe ozondekorona okuza komahi wozonganda na wina ovanarupa, ovatjiwe novananḓero varwe vomauye wopendje.

Okuṋuṋunga nokunongonona omapu pekepeke ongondoroka nOtjiṱiro Otjindjandja tjOvaherero. Ombara Katjiua amai paturura indi Omandaha, omayuva tji ye ri 30 komueze imbwi ama teza ozombura o-120 zokuhuka omuinyo norukondjo. 

Tjazumba ape kongorere orupa orutenga ndu maru tara momakuruhungi wOtjiṱiro Otjindjandja ndu maru patururwa i Miṱiri Festus Muundjua ngu ma tara kokutja mbya twara kOtjiṱiro Otjindjandja ovikwaye. 

Orupa orutjavari aru konḓonona kokutja kombunda yOtjiṱiro Otjindjandja pa kara tjike motjiwaṋa tjOvaherero tji tji za nokuhuka omuinyo. 

Okutara kozondekurona za Namibia, Otjauana, Osouth Afrika nOangora.  

Korusenina eyuva tjingero orupa orutjatatu aru hiti momuano Otjiṱiro Otjindjandja ngamba mbu tji ṱuna kozondekurona. 

Eyuva oritjavari, tji ye ri etenga ku Seninaṋi, morupa oritjaine ombongarero ai utu nokutara mongondjero yotjisuta okuutira korupa rOvaherero mongondjero yonguturiro yehi; ongwatero yOnamibia ekutuke nomautiro wotjirwa tjOtjisuta; ovikasuka ovitenga vyOvaherero mongondjero yOtjisuta; nongondjero yOvaherero I pukatwe i yotutu pekepeke. 

Orupa Orutjatano eyuva tjingero ndi ri eyuva oritjavari rombongarero indji tji ye ri etenga ku Seninaṋi, ombongaerero mai paturuka amai tara kozongondjero ozomborero zomuyaruke Ombara Otjitambi Kuaima Riruako; ngandu Ombara Otjitambi Omuyaruke Vekuii Rukoro tji ma kahitisa otjiposa motjombanguro tjOmahi Omakutasane yAmerica nu korusenina Katjiua tji ma kambura ozotjikira. 

Ovajuuta tjaave kondjisa Otjisuta tjawo, wina va kara nombongarero ndji hi na ya isire umwe wawo pehi ndjaai tjiukirwe otjOjewish Claims Conference. Tjimuna indji wina tji mai sanewa Ovaherero Claims Conference.