Auleria Wakudumo
Omupresidente Netumbo Nandi-Ndaitwah okwa holola kutya ehongo moshilongo, mwa kwatelwa ehongo lopombada moiputudilo aishe yepangelo otali ka kala loshali okutameka modula taiya omanga opeendjela younona vena ounghundi ya wedelwa okudja poN$350 fiyo opoN$1 600.
Nandi-Ndaitwah eshi okweshi shiivifa eshi ta shilikile oshiwana lwotete momutumba wopashiwana Etinhe.
“Epangelo otali ka futila ovanafikola aveshe koiputudilo yopombada noyopedu yepangelo oshimaliwa shoku li nyolifa, hashi futwa petameko lomudo ile koshikakao,” Nandi-Ndaitwah ta holola.
Oiputudilo yepangelo omwa kwatelwa eefikola dokomake hano eeTechnical neeVocational Training Centres (VTC), Unam oshoyo Nust. Nandi-Ndaitwah okwa ti eshi otashi ka tulwa moilonga okaendqa namhadi. “Onghene ohandi pula ekwafo kovadali nokovakwanedimo vovanafikola opo va shakeneke epangelo ondjilakati mokukwashilipaleka kutya otava ka futile ounona omihandjo ile omalukalwa manga tava i kofikola nokuwanifa po eemhumbwe dimwe da wedwa po dofikola,” Nandi-Ndaitwah ta ti.
Nandi-Ndaitwah okwa holola yo kutya ovanyasha tava kufe ko eenghaku keemhadi opo va twikile omalihongo avo opombada.
Ovanyasha ova indilwa opo va longife onghatu ei vei pewa oshali kepangelo okulihonga nokuyambula po oshilongo monakudiwa.
NSFAF
Omupresidente okwa holola kutya ehangano lokuyambidida ovanafikola loNSFAF otali ka ya mumwe nouministeli wehongo, ounghulungu, ovanyasha nomufyuululwakalo muOctoba neudo.
Nandi-Ndaitwah okwa ti ehangano otali yi mumwe nouministeli opo ku pungulwe oshimaliwa nokuwedela eemhumbwe dovanafikola.
Opeendjela younona
Omupresidente okwa holola kutya opeendjela yovakulupe itai ka wedelwa neudo nepangelo otali ka wedela ashike opeendjela younona ava vena oulema fiyo opoN$1 600.
Nandi-Ndaitwah okwa ti okushishi kutya nakufya Hage Geingob okwali a ninga eudaneko kutya otaka wedela opeendjela yovakulupe fiyo oN$3 000.
“Ohandi pula ovakulunhu vange opo veli mange manga epaya opo tu tale kutya ounona vetu novanyasha vetu ohatu va kwafa ngahelipi,” Nandi-Ndaitwah ta ti.
Nandi-Ndaitwah okwa weda po ta ti ota kendabala okufinda okuhena oilonga movanyasha oko kwa ya pombada neepelesenda dihapu paife movanyasha.
Okwa kwashilipaleka yo kutya opeendjela otai ka enda nokuwedelwa ashike ha dula yoneudo.
Opeendjela younona vena oulema ohai kwatwa kounona ve fike po 58 087 omanga opeendjela younona voukwanaluhepo hai kwatwa kounona va fika po 375 765.
“Onghene epangelo otali ka wedela opeendjela younona ava vena oulema okudja poN$350 fiyo opoN$1 600,” Nandi-Ndaitwah ta ti.
Oupale vomaudano
Epangelo otali ka tunga oupale vomaudano hamano, tali ka lundulula nokulongolola oupale va heyali neudo.
Epangelo otali ka tunga okapale komaudano mOmuthiya moshitukulwa shaShikoto, moMariental moshitukulwa shaHardap, moGobabis moshitukulwa shaMaheke, Katima Mulilo moshitukulwa shaZambezi, mOtjiwarongo moshikutukulwa shaTjozondjupa nomoNkurenkuru moshitukulwa shaKavango West. Epangelo otali ka tungulula yo oupale vaheyali mOshakati, Rundu, Independence Stadium moWindhoek, Outapi, Swakopmund, Eenhana nomoKeetmanshoop.
Nandi-Ndaitwah okwa holola yo kutya otaku ka tungwa omulti purpose centre mOpuwo moshitukulwa shaKunene.
“Epangelo otali ka longifa eemiliona N$200 okutunga oupale vopondodo yopedu moikandjohololo ya yooloka moshilongo,” Nandi-Ndaitwah ta ti.
Omupresidente okwa holola kutya omaudano okwa pumbwa okutalwa ko nokufimanekwa ngaashi omaifano aeshe. Otwa pumbwa okuxulifa po okutala omaudano afa omalihafifo,” Nandi-Ndaitwah ta ti.