OHANGWENA – Oshimaliwa shomiliona N$1.6 osha ongelwa kouvalelo wowina oo kwa li wa unganekwa kelelo laUkwanyama mexuliloshivike wa li kOmafo. 

Oshimaliwa otashi ka longifwa moshivilo shomaongo osho tashi kala ko neudo momafiku 10 Mai 2025 kOuhamba kOmhedi. Pefimbo louvalelo ou, ovakwashiwana ova yandja yo eengobe di li 36 opo oshiwana shi linyangushe pefimbo lomaongo. 

Omunashipundi welelo laUkwanyama Elias Waandja okwa ti oshiwana osha tameka nale okutwala omaongo kOuhamba. 

“Otwa tameka nale okutula oinima aishe peenhele. Otwa longekida onduda yokutuvikila omaongo opo i kale ya tulwa omaongo mahapu oo taa ka nuwa koshivilo,” ta ti. 

Omudo keshe omalelo opamifyuululwakalo monooli ohaa dimbuluka efiku lomaongo omo haku hoololwa kutya oshivilo otashi ka ningilwa peni. 

Omaongo okwa fimana pamufyuululwakalo wOshiwambo naashi osha eta opo ku kale ku na efiku lowina olo hali eta omalelo opamifyuululwakalo pamwe. 

Omudo wa dja ko oshivi lo shomaongo okwa li sha tyapulilwa kelelo laNdonga. 

Okwa didilikwa efimbo ovanhu hava kala va hangana pamwe novashiinda shavo tava nu ongongola vo tava imbi tava ti: ‘ongongola nai kuke tu nwe oikundu.’ 

Omaongo okwa fimana natango molwaashi ohaa etele ovanhu oyuuyemo eshi hava landifa omaongo. 

Waandja okwa ti koshivilo shomaongo otaku ka kala omalelo opamifyuululwakalo a yooloka, Omupresidente woshilongo nosho tuu ovaleli veendodo da yooloka. 

“Otwa teelela omuvalu wovanhu tava ka holoka kOuhamba,” a weda po. 

Okwa ti ovanhu nava ye va ka nwe omaongo oshali molwaashi omunhu keshe ota ka dja ko a makela ongongola. 

Waandja okwa kumaida ovanhu opo va nwe omaongo nombili pehe na omalwoodi unene tuu keendingosho. 

-fhamalwa@nepc.com.na