Jazema Hangero

Omajora nongero yOmimbonde Vitano, Uzuva Hevita, ma tja wa kozwa i yohaṋi ndji ri mokati kotjiwaṋa ndji nyomokera ko tjimuna otjikuryoma. 

Omambo nga we yehungirire ongurova yomatoneno wovitenda mOmauezonjanda kotjimbumba tjomitanda vyOvambanderu. Nazeri  kutja ombura ndji mai rire ombura yohanganeno, ondjesirasaneno, omerisusuparisiro omaunguriro wakumwe pamwe norusuvero, tjinene pokati kozonganda zomauhonapare wombazu yOvaherero nOvambanderu.

Komurungu ma raisa kutja ovandu ovazorondu poo ovahungire veraka ndi ve nozongama zohange nohanganeno apehe pu ve ri, tjinene ovanane votjiwaṋa, tji ve ri povitjitwa poo pozonḓiro ve pambara ohange nohanganeno pokati komarapi ayehe posi ya tji mave pitisa omatjivisiro mokatenda okakore komambo, ave pitisa kutja, “kovandu imba mbu tu kayenda pamwe.” 

Hevita  ma munu kutja embo ndo kari ri popezu nokuyeta ohange poo ohanganeno mokati komuhoko. “Ove kamoo tja ovandu imba mbu tu kayenda pamwe tjazumba mo isana ohange poo ohanganeneo kovandu.”  Naweza kutja auhe tja isana ovandu imba mbuve kayenda pamwe, okutja imba mbu mbe ha kayenda punaye kanaave ya. “Nambano tji mo kaura ohanganeno, mo kaura ku uṋe? Imba mbu mwa sokukawondja pamwe we vesa. Okaṋa karwe ku ke tomba ovandu okuya pamwe okukamburira ehoze keṋina komitanda.” Hevita ma ningire omitanda okurwa otjirwa otjinene tjokukondjisa okuyeta oviwaṋa pamwe.     

Uasora Katjivikua, omuture wa Karupana, ma raisa kutja tjiri ohaṋi ndji ri mokati kotjiwaṋa i ve teya noondarire ombango yokuzera okukara norupa movitjitwa vyombazu, na weza kutja ovandu tji ve rihongo okuyakurasana nokutengasana pendje nokutemangurasana nokuhembasana, otjiwaṋa matji kanḓoma. 

Na ningire ovanane vombazu avehe okuya pamwe ve zengurure ohaṋi pokati kawo ve ute okupaha oviṋa ovisemba mbi mavi rundurura ehupo rwotjiwaṋa nokutwara omuhoko mbwi komeho.