Ozoeuro omahavarwa 17 N$, nḓeri Ozondora za Namibia omahavarwa ape o-324, oonḓengu yotjisuta ozondekurona tjiva tji ze vyavanga, okusasaneka nokutambatamba.
Okusasaneka nOzoeuro etau o-1.1, nḓeri Ozondora za Namibia ape omatau o-18 N$ otja kOnḓuvasaneno pokati ka Namibia nEhi rOvandoitji. Ehi ndi tji tje rivangera otjombatero kozondekurona zoviwaṋa vyovaṱi novakuru mba ihamisiwa i yOtjiṱiro Otjindjandja. Tji tja tjitirwe i yohoromende yohuurire yOvandoitji kOvaherero, Ovambanderu nOvakwena. Ohoromende yEhi rOvandoitji tji itja ombatero uriri ngunda oya Namibia nozondekurona tjiva tji ze tja Ootjisuta.
Omahavarwa nga ye ri morutuu rwomuhunga nongurameno yozombara za Kandjoze oro nai nduri mokusoporwa noku hungirirua nu kangamwa oruveze ndu maru ya kotjiwaṋa. Okutjitjivisa kutja ozo mokunakaura Onḓuvasaneno Yapamwe, ndji kuza Ojoint Declaration, ousupi OJD, nangwari kaze ri tjo ze na mbi za ṱizira kotjari poo kehi yomakwapa.
Otja korutuu ndwi ozombara nḓu maze tja maru handjaura ouparanga noupapi, Otjisuta momuzura noumbomba watjo katjisere okupambaukwa nombatero ndji ri po nai pokati komahi ayeevari inga. Nungwari Otjisuta tja sere okuyeta otjivara tjapeke nongarerere mongorongova yozondekurona. Okuṱuna oviṋenge mehupo nombuiro yazo, tjimuna okuverandera ehi nomekurisiro; oviungurisiwa mu mu nozomburo zomeva nomaṱiziro wazo mongaro ndji ri yo kutja ze rire ozongarerere nozongareke zawo zomuinyo wakangaaruhe; oviyakise nozomburo zavyo ozongarerere wina nokuzeṱizira momaunguriro omakarerere; omatungiro wozondjira nokuzeṱizira mongaro ombwa; omaṱunino wondjaya omapwe; ovihakayenise ngandu kovyoruveze rwakandino ndi tjimuna otungovi; omahongero; ouveruke; okututumuna ozondekurona nokusembamisa otuveze twomazemburukiro womakuruhungi wazo; okuvevatera okuyarurapo otutumbo twazo oto tu twa vakerwe kuzo; okutumba oviungurisiwa vyotutumbo novikunwa; na wina okuhina ku patera ozondekurona nḓa rimbara mouye.
Orutuu ndwi wina maru yarukirepo kutja onyuṋe otja tji iri nai ya tuvirirwe navi tjinga ngunda ozondekurona ozeni aza sere okutarasana movitoko vyomeho ku nohoromende yEhi rOvandoitji, katji pa kayenda nozo za karira ovatarere uriri novahungirirwa po i yohoromende ya Namibia. Pu pe he ri otja kOngutiro yo 2006 yOmbongarero yOtjiwaṋa, ndji tja ohoromende ya sere okurira oyapure uriri pokati kozondekurona nEhi rOvandoitji.