Omupopiliko wehangano loNAMDIA, Beverley Coussement okwa kumaida oshiwana opo shi xulife po okutandaveleka ouyelele woipupulu kombinga youwe ovo va kana kehangano olo.
Coussement okwa pitifa omukanda mexuliloshivike ta ti NAMDIA okwa didilika ovanhu tava popi oipupulu komapandja oko malungula kombinga yomunyeka wokawe oo wa ningwa neudo koWindhoek.
NAMDIA ehangano olo ha li tuvikile okawe ngeenge ta kadi keemina
Okwa yelifa ta ti opolifi onghe nga tai twikile nokuninga omakonakono kombinga yoshikumungu eshi.
“Ombelewa yange oye li longekida okukala tai yandje ouyelele tau ka monika po,” ta ti.
Okwa ti ngeenge oshiwana otashi tandaveleke ouyelele woipupulu komalungula nena eshi otashi i oilonga yopolifi moshipala,” ta ti.
Okwa ti fiyo opapa opolifi oye shipondola okumona okawe ke li pongushu yeemiliona N$40.6 oko kwa li ka vakwa neudo koNAMDIA.
Okwa ti ongushu youwe va vakwa koNAMDIA oi li peemiliona N$314.9.
“Okawe kongushu yeemiliona N$274.3 ina ka monika natango,” ta ti.
Okwa pandula opolifi eshi tai twikile nokuninga omakonakono.
Neudo, okwa lopotwa ovalumenhu vane va ponokela eembelewa doNAMDIA efimbo lokomatango ndele tava vake mo ouwe.
Poshiningwanima opa dipaelwa omunailonga woNAMDIA kwa li ta longo ongomukulunhu koshikondo sheameno, Eiseb Francis weedula 57.
Francis okwa yashwa nondjebo momutwe kovafekelwa pefimbo kwa li e li kombelewa ta longo.
Opolifi oya hokolola tai ti pefimbo loshiningwanima umwe womovafekelwa Max Endjala okwe liyasha nondjebo meembelewa doNAMDIA eshi a mona kutya okwa fitikininwa mo kopolifi.