Nandarire mouṱiṱi wayo nokuhina maai kerihiva noupapi nu yehi nda rira ehwe ra ngu nepingo nondjou ya ngu nenga Epukiro kari neṱa ra ri ku ingwi ngwari otjiuru tjehi, Omutjuṋikwa Nangolo Mbumba.

Komurungu womaherukiro we kotjihavero ngwa rumatisire ozoresevate ndatu, Omongua mOmaheke, Otjimbigue, Erongo na Vitoto mOtjozondjupa ehi kozoresevate inḓa okuweza kehi razo romaryo. 

Epukiro nai wina ndi nouzeu womaryo mena rehi raro nda rira ekwaṋi mena rouingi wovandu novinamuinyo nganda ovengi mba uta okuriyerera kOeisepa oyo ndja hozerwe otjehi ovature va Pukiro ku mave riyerere nokutandavera posi ya nambano nai nda rira kararakanwa okuiisira kozondjakaha nḓe ri moviwaṋa pekepeke ohunga nehi. Nḓe za momananeno wotumbo na wina omarandisiro wehi mOisepa ku kangamwa ngandu kovandu okuza pendje kotukondwa twarwe. Momarandisiro wehi ra Eisepa mu mwa tamunwa omana yovanane vombazu. Tjingetjo momananeno wotumbo nosuverengo tjingetjo ndji kayendisiwa i yomauhonapare wozombazu. 

Kape na ombata kutja Epukiro ra rira ekwaṋi tjinga nandarire movirongo vyaro tjiva ama mu yenene okukara ozonganda nandarire nḓu maze vaza omirongo vitano. Nu ndoovazu motjirongo tjimwe mape ya amu kara ozonganda o-50 okutja vari imbyo ovinamuinyo omundu ka ku mo hungirire. Otjombinḓe nai ovature kehi yonyota nourumbu mu ve kara ama kwanga nehi nokutja ovirongo nai mbiri ayo ouini vovandu tjiva uriri mbe turira muvyo, vi ute okusekirisa ovature varwe, wina ozosarama ondjendjeto natjo ze weziwe kutjo. Omundu amo zemburuka katjisupi ombura ndja zuko umwe wovakwange ayari oserekaze Alma Tjiuamana Ngaujake omuture wa Koppie Aleen.

Kehi yOveta yOmarundururiro wEhi rakangamwa yo 2002 Mbumba wa pitisire ondyero yokutja ehi rohoromende ndi hi ya randisa nomaitaverero wOmbongarero yOtjiwaṋa yeweziwe kozoresevate. Orutuu rondjivisiro yozoveta nomazeva wohoromende ndja pitisirwe tji ya ri 19 komueze mbwi, opu mai tjivisire kutja kOtjimbingue kwa weziwa orupa rosarama indji Okangava o-72 mozondendera za Tjandjomboimue ndji nozoheketara 15,160.19. Kovitoto aku weziwa orupa rosarama indji Osema ndjiri meṋe ya Kahandja ozoheketara o-5374.39 norupa rosarama indji Ongusince wina mozondendera za Kahandja rounene wozoheketara o-3753.93. Ngunda kOmongua a kaweziwa orupa rosarama indji Oalpha 628 nozoheketara o-6767.6098.