Sam Shololo ou a kwatwa po pefimbo kwa li ta kendabala okuvaka okawe navakwao kehangano loNAMDIA okwa anyenwa omhito yokulifutila mo modolongo.
Okwa holoka momhangu yaMangestrata yaWindhoek moKatutura onghela.
Oshibofa shaye osha undulilwa komafiku 23 Mai 2025 opo ku ningwe omakonakono omoule.
Omufekelwa mukwao Joel Angula naye okwa anyenwa omhito yokulifutila mo modolongo pefimbo a holoka momhangu oshivike sha dja ko.
Shololo okwa kala a tambulilwa moshipangelo shaCentral koWindhoek ta mono epango molwaashi okwa li a mona oshiponga.
Omhangu oya ti ovalumenhu ava itava pewa omhito yokulifutila mo molwaashi oshiwana oshe va tila nosho yo okuya omakonakono opolifi moshipala.
Otava tamanekelwa oshibofa shedipao noumbudi wokawe.
NAMDIA ehangano hali tuvikile okawe ngeenge ka dja keemina.
Omufekelwa mukwao Max Endjala ou a xulifa konima eshi vati e liyasha nondjebo okwa pakwa Olomakaya kokumunda Oluteyi koshitukulwa shaMusati.
Opolifi oya hokolola tai ti Endjala okwe liyasha nondjebo meembelewa doNAMDIA eshi a mona kutya okwa fitikininwa mo kopolifi.
Okwa ka xulifila koshipangelo efiku tuu oshiningwanima sha longwa.
Endjala okwa li omunailonga kehangano loTrustco kwa li ta longele koWindhoek.
Poshiningwanima opa xulifila omunailonga woNAMDIA kwa li ta longo ongomukulunhu koshikondo sheameno, Eiseb Francis weedula 57.
Francis okwa yashwa nondjebo momutwe kovafekelwa pefimbo kwa li e li kombelewa ta longo.
Opolifi oya hokolola tai ti ovalumenhu vane ova ponokela eembelewa doNAMDIA ndele tava vake mo ouwe ovo hava di keemina.
Oshiningwanima osha ningilwe koWindhoek oshivike sha dja ko efimbo lokomatango.
Omakonakono opolifi otaa twikile moshiningwanima eshi.
-fhamalwa@nepc.com.ma