Charles Ndeumane
Gumwe gwomaalumentu ya homata mboka anuwa ya yugu omunangeshefa moWindhoek oshimaliwa shomwaalu inaa gu ndhindhilikwa okwa hulitha sho a yahwa kopolisi.
Omupopiliko gwopolisi commissioner Kauna Shikwambi okwa koleke kutya omufekelwa ngoka okwa yahwa kopolisi pethimbo ya li taya umbathana konima yoshiningwanima sheyugo kwa homatiwa. “Aafekelwa oya li yatatu, gumwe okwa yahwa nokusa, omukwawo okwa mangwa, omangwa gumwe a fadhukapo,” osho Shikwambi a lombwele Kundana.
Shikwambi okwa ti uuyelele ina wu za mo natango auhe kombinga yoshiningwanima shoka, ashike eyugo kwahomatiwa olya kolekwa.
Otaku hokololwa sha endele nayi aalumentu yatatu mboka taku fekelwa kutya oyo oongangala ndhoka dha li dha homata oondjembo ndhoka dha li tadhi kambadhala oku yuga omunangeshefa gwosalona mepaandanda lyaIndependence Avenue moWindhoek.
Oshiningwanima shika osha ningwa ongula yOmaandaha gomasiku 2 Juli 2024.
Otaku hokololwa aafekelwa mbaka ya ningi omupya sho ya monika kaanambelwa yopolisi mboka ya li mohauto ndjoka ya li popepi. “Onda mono aalumentu yaali ta ya zi mosalona ta ya matuka ya humbata uushako uyali wiimaliwa, onda pula omuhingi ngoka twa li a naye kulule ko kondapo opo tu tale kutya oshike tashi ningwa. Sho tweya popepi nayo onda nuka mo mohauto eta ndi ya tindha. Oya tameke okuumba, nangaye onda umbu nonda yaha po gumwe pethimbo twa li tatu umbathana nayo,” osho omupilisi ngoka kwa hokololwa owala kutya oye Angula a popi moonkundathana noshikundaneki shaNBC.
Kamatyona a kwata mukwawo koonkondo
Moshiningwanima sha yooloka shoka sha limbilike oshilongo, okamati koomvula 14 oka holoka mompangu yamangestrata gwaNdangwa sho anuwa ka katwa okamati koomvula 11 onkonga.
Oshiningwanima shika osha holoka momukunda Onkumbula mOkankolo moshitopolwa shaShikoto
Ompangu yamangestrata gwaNdangwa oya gandja omufekelwa metonatelo lyaakuntu ye oshoka anuwa ina gwanitha oomvula dhoku ya mondholongo natango.
Otaku hokololwa okamati hoka kali ka homata ekatana ka ningi omatilitho noku kwata okamatyona ke li mondondo ontitatu koonkondo.
Omukuluntu gwopolisi moshitopolwa shaShikoto Theopolina Kalompo-Nashikaku okwa ti omakonakono oga ulike kutya omufekelwa okwa yi megumbo moka hamu zi nakuninga oshihakanwa omutenya gwOlyomakaya manga ali mo oye awike.
Omufekelwa okwa pula a pewe iikulya, naasho a mana oku lya okwa shituka thimbi e ta ningile nakuninga oshihakanwa omatilitho nekatana. Okwe mu nuukile, te mu tula kombete e temu kwata koonkondo.
“Oshipotha osha lopotwa ku yina ya nakuninga oshihakanwa, ashike natango opolisi oyi ipyakidhila nomakonakono opo ku tseyike kutya oshe ya ngiini puuyelele,” osho Nashikaku a popi ngaaka pethimbo lyoonkundathana.
Omufekelwa omukalimo gwomomukunda Onanyege moshitopolwa shaShikoto.