Auleria Wakudumo
Omuhandjo woshiputudilo shopaungoba moKhorixas sha shivika nawa Khorixas Vocational Training Centre ou li metifa lokutungwa. Oshiputudilo eshi opo sha patululwa pambelewa odula ya dja ko komupresidente mukulu Nangolo Mbumba otashi endifa yoo nawa okutunga eengulu dopaungoba dovalihongo.
Omukulunhu woKhorixas VTC Hanna Garises okwa holola kutya oshiputudilo otashi ka tambula ovahongwa olweefo litivali neudo oshoyo okukala vena ovahongwa ovo va uka modula onhivali.
Nonande taveshi endifa nawa, Garises okwa indila ovakalimo vomoshitukulwa shaKunene opo ve linyolife koshiputudilo shopaungoba va dule okumona owino moilonga yokomake.
“Vahapu inava mona omhito yokulilongela vovene shaashi otava longele ovayandji voilonga va yooloka ashike oiputudilo yopaungoba ohai yandje ounongo oo to dulu okulongifa okutota ongeshefa yoye nokulilongela kwoove mwene,” Garises ta ti.
Garises okwa holola kutya moshitukulwa shaKunene omu na ashike oshiputudilo shopaungoba shimwe osho shi li moKhorixas.
Mayola wodoolopa yaKhorixas Sylvanus //Awaseb okwa twa ovalihongi omukumo opo ve litule mo melihongo lavo nokulonga noudiiinini okukwashilipaleka kutya ova findana moihongwa yavo.
“Ohandi mu indile mu kale ovahongwa ovaduliki novadiinini melihongo leni.
Ohandi mu indile yoo mu fimaneke ovahongi veni ovo hava longo nelitulemo opo va kwashilipaleke kutya eemhumbwe deni adishe oda wanifwa po,” ta holola ngaho.
VTC Khorixas okwa tungwa kongushu yoshimaliwa shi fike peemiliona N$79.5. Eemiliona N$21 oda longifwa okuwapaleka nokufikameka po onhele opo pa tungwa, okutula omeva nolusheno, oluumbo loshiputudilo opo shiha hanaunwe po keendjaba nokoifitukuti ikwao, oshimaliwa osha longifwa yoo oinima ikwao ya wedwa po mokuninga omalongekido oshiputudilo.
Omanga eemiliona N$58.5 da nhuninwa okutunga eengulu doshinanena dovalihongi.
Oshiputudilo shopaungoba eshi osha pewa onhele onomenawina kelelo lodoolopa yaKhorixas louhapu weehecta 25.5.
VTC Khorixas oha yandje ehongo nomadeulo moilonga yokomake ngaashi oilonga yokomatungo, okulonga neekila dokutalaleka, okuxwikila nokulonga noitenda, okulihongela okupangela oudjuwo naikwao ya weda po.