Omukainhu weedula 53 okwa dengwa noikulumbwati kookalyamupombo meumbo laye Etitatu mokati koufiku lopotundi 00h10 momukunda Eendombe moshitukulwa shaMusati.
Omukonakoni woimbuluma wopolifi moshitukulwa shaMusati, Omupedu Komufala Moses Simaho okwa hokolola ta ti omukainhu okwa hangika a kofa kovafekelwa vavali va homata eembistoli mbali noiti italala ya kewa komuti womusaati.
Okwa ti ovafekelwa ova tameka tava kondjifa okuteya omuvelo wonduda yokunangala noiti ei kwa li ve na, nokonima eshi va pondola okuteya po omuvelo ova tameka tava pula omukainhu oimaliwa neeshapi dotuwa yaye.
Okwa hokolola ta ti ookalyamupombo ova tameka tava ningile omukainhu omalitilifo kutya otave mu dipaa ngeenge ina yandja oimaliwa neeshapi dotuwa. Eshi ovafekelwa va mona kutya nakuninga oshihakanwa ina hala okuyandja eeshapi dotuwa, ova tameka okudenga omukainhu noiti ei va longifa okuteya po omuvelo.
Nokonima nakuninga oshihakanwa okwa yandja oshapi yotuwa yaye eshi a mona kutya ota likila noikulumbwati.
Opolifi oya ti eshi ovafekelwa va pewa eeshapi dotuwa ova shinga po otuwa ndele tava faduka po nayo.
Otuwa oToyota Hilux VVTI i na oikoto ivali noluvala hali vema yonomola N10336UP, i li pongushu yoshimaliwa N$380 000. Kape na omufekelwa a kwatwa po natango, notuwa inai monika onghee omakonako opolifi otaa twikile.
Opolifi oya indila moshiwana kwaau e na ouyelele opo a kale a lopotela polifi keshe i li popepi. – fhamalwa@nepc.com.na