Opolifi moshitukulwa shaShikoto oya patululila oshibofa omukulupe weedula 73 osho yo oshitenya – omulumenhu weedula 53 molwaashi vati va vaka po okaana keedula 10 komuhoko wOvasan noku ke kaninga omunailonga womeumbo. 

Otaku hokololwa kutya muFebuluali neudo omukulupe oo e li omukalimo womomukunda Omutse-B, okwa kufa po okaana kovanhu, okakadona keedula 10, ndele te ka yandje koshitenya hashi di komukunda Onambundu shihe li pahalo lovakulunhu vako. 

Ouyelele wa yandjwa kopolifi otau ti okaana oko keedula 10 pamwe nomumwainamati weedula di li lwopo 20 okwa li vaka talela po okamwaina keedula di li pokati kaheyali nahetatu oko taka tekulwa keumbo lomukulupe ou paife e li omufekelwa. 

Eshi va ya keumbo oko, vati okaana aka keedula 10 oka fyaala po. 

Konima yomafiku avali, ina okwa ya ko keumbo oko ta pula okaana kaye oko, ashike omukulupe vati okwa ti okaana oko ine ka mona, inaka fyaala mo meumbo laye. 

Omukainhu ou vati okwa kala nokuya keumbo lomukulupe oo ta pula okaana kaye, ashike omukulupe okwa tameka a handuka, ta ti ke shi kutya omukainhu oo ota popi shike. 

MuApiilili, ina yokaana okwa ka mona ouyelele kutya okaana kaye oka twalwa keumbo loshitenya shomukulupe komukunda u li popepi nOmuthiya. 

Omukainha okwa lopotela opolifi oyo ya ya ko keumbo oko taku popiwa, nokaana oko shili ka hangika. 

Ovafekelwa ava inava kwatwa po natango, ashike ova patululilwa oshibofa shi li koshi yokatendo ke li omhinge nokuendaendifa ovanhu moumbudi kotete komomudo 2018. 

-hshaanika@nepc.com.na