Omukainhu weedula 34 vati okwa dipaa okaana kaye keemwedi nhee nodopi pefimbo kwa li ta kondjo naxe yokaana shaashi e mu hanga e li monduda nomukainhu umwepo. Oshiningwanima osha ningwa oshivike sha dja ko lwopotundi 23h00 komukunda Ankambo moshitukulwa shaShana.
Omukulunhu wopolifi moshitukulwa shaShana Commissioner Naftal Sakaria okwa koleka oshiningwanima eshi. Nakuninga oshihakanwa okaana kokamati.
Opolifi oya hokokolola tai ti ina yokaaka okwa ya keumbo lomulumenhu waye ou e li xe yokaana, e mu landula okudja keendingosho.
Otaku hokololwa kutya omukainhu ou okwa hanga omulumenhu waye e li monduda nomukainhu umwepo.
Okwa tameka ta kondjifa okupatulula ponduda ashike omulumenhu ina hala.
Okudja opo omulumenhu okwa penduka ndele ta kelele opo omukainhu oo a kale ina ya monduda yavo.
Opolifi oya hokolola tai ti okudja opo ovo vavali ova tameke okutanguna nokukondja. Okaana vati oka wa mo modikwa nokulidenga pedu.
Xe yokaana okwa kufa po okaana ndele te ka mwenifa shaashi okwa li ta ka kwena unene. Otaku hokololwa kutya omukainhu okwa twikila ta kondjele okuya monduda ashike omulumenhu ote mu kelele. Opolifi oya hokola tai ti omulumenhu okwa tula okaana pedu opo a dule okulela omukainhu waye aha ka lwe namukwao.
Vati manga ina yokaana e kwete odopi oyo kwa li ta kendabala okudengifa omulumenhu waye, odopi oye mu xutuka ndele tai denge okaana komutwe.
Okudja opo ina yokaana okwa didilika kutya mboli okaana oka mona oshiponga neenghono ndele ta ka twalwa koshipangelo shaNandjokwe.
Okaana oka xulifa efiku tuu olo moule wovili eshi ka fika moshipangelo. Opolifi oya koleka tai ti kape na omunhu a kwatwa po ashike epeko loshibofa ola tuminwa kombelewa yomupangulidjai opo a ninge omamonakono nomatokolo.