Opolifi moshitukulwa shaShana otai konakona oshibofa shomukainhu weedula 21 vati a pulumuna ndele ta tula okaana kaye kokakadona monailona noku ka holeka mosikopa. 

Oshiningwanima osha ningwa Etitatu efimbo lokomatango modoolopa yaNdangwa meumbo lavo. 

Opolifi oya hokolola tai ti omukainhu ou okwa li e li meumbo nounona vashona pefimbo a ninga oshimbuluma eshi. 

Otaku hokololwa kutya ovakulunhu vaye meumbo inava hangika mo pefimbo loshiningwanima ashike ova ka didilika omukainhu ou ehe na vali eteelelo. 

Vati eshi a pulwa kuina okwe mu lombwela kutya ye kakwa li e na eteelelo nokonima ove litwa olutu lokaana li li mosikopa. 

Omukainhu paife okwa tambulilwa moshipangelo shaNandjokwe ta mono epango lopaunamiti. 

Opolifi oya ti omufekelwa ou ina kwatwa po onghee omakonakono opolifi otaa twikile. 

Opolifi oya ti okwa didilikwa oibofa younona tava ekelwashi kooina ya ninga ihapu unene, onghee ovakainhu ova kumaidwa opo va xulife po okulongela ounona ominyonena. 

-fhamalwa@nepc.com.na