ONGWEDIVA – Omunambelewa mehangano lokuyandja ohonde loNAMBTS konooli Adolf Mwafangeyo okwa ti efimbo loutalala ehangano lavo ola taalela omhumbwe yohonde ina i wana molwashi ovanhu ova kwatwa komukolo neshikisha.

“Omunhu ngeenge e na omukolo neshikisha oha shi eta a kanife ohokwe yokukayandja ohonde. Oshi li omukundu wa kula wa taalelwa kehangano letu,” ta ti.

 Mwafangeyo okwa ti nena otava kala ve li kendiki lomangeshefelo laGwashamba mOndangwa okudja 08h00 fiyo 18h00.

Okwa pula oshiwana opo shi holoke momwaalu muhapu okukayandja ohonde pefimbo olo tava ka taalelapo eenhele da yooloka.

 “Omafiku 6 omwedi ou ohatu kala tu li koshipangelo shaMuthiya okudja potundi 11h00 fiyo 18h00,” ta ti.

Okwa weda po ta ti omafiku 12 otava kala ve li koshiputudilo shopaungomba shoRundu VTC oshoyo omafiku 13 ove li koshiputudilo shaUNAM moRundu natango.

Mwafangeyo okwa pandula ovanafikola koiputudilo nokeesekundufikola molwashi ohava kala alushe ve na ohokwe okuyandja ohonde.

Okwa kumaida oshiwana opo shi twikile okuholoka momwaalu muhapu okukayandja ohonde molwashi ohonde oya fimana kovanaudu.

Okwa ti NAMBTS ota twikile okukwashipaleka kutya ovanhu ve li momhumbwe yohonde koipangelo ova pewa ohonde opo eemwenyo davo di xupifwe.

“Ohonde ei tai yandjwa koshiwana ohai kwafele ovanhu vena omikifi da yooloka ngaashi okaangela, pefimbo oomeme tava pulumuna, omunhu ngeenge ta tandwa nosho tuu omikifi dikwao,” ta ti.

Okwa lombwela oshiwana opo shitopolafane ouyelele kombinga yefimano lohonde opo ovanhu va kale ve na eudeko la wana nokukala ve na ohokwe yokuyandja ohonde. 

Okwa ti endiki lavo olo li li moshipangelo shaShakati oha li longo Omaandaxa keshe okudja 10h00 fiyo 18h00 oshivike keshe. fhamalwa@nepc.com.na