Omukulupe ngoka a li a indile omakwatho moshigwana oshiwike sha zi ko, sho a li a thigwa pomutenya komulilo, a mono omakwatho gamwe po.
Cornelius Ndinghoshi Nakanyala (72) okwa kwathelwa niikulya, iizalomwa nomakumbatha kehangano Kwathela Oshigwana. “Otwa pandula kwashihe twa yambidhidhwa nasho kehangano ndyoka. Ka kwali tuna sho ta tu tuli, ta tu zala, ihe otwamono omakwatho ngoka twa yambidhidhwa nago,” Nakanyala ta ti ngaaka. Ta gwedha po ta ti, natango ota indile moshigwana kaasimutimahenda, opo natango ya yambidhidhendje niipeleki, omataleshe opo adhengele ondunda yimwe omanga taya totulula.
Cornelius Paulus omukuluntu mehangano ndyoka okwa ti, shika okwali ye shiningi omolwa elalakano lyehangano ndyoka Kwathela Oshigwana.
“Kwathela Oshigwana otashi ti, okukwathela oshigwna una shili muupyakadhi. Otwakwathele omukulupe nguka konima kwali twakundana kutya egumbo lye alihe olya pyapo thiluthilu, ihe inahupapo nasha,”Paulus a popi ngaaka. Ayelitha ta ti, ehangano ndika kalishi lyokukwathela ashike mboka yeli miitopolwa yapwatwa omolwa omukithi gwoCovid -19, ihe olyo kukwathela kehe ngoka eli mompumbwe. Ta hokolola ta ti, omulilo ngoka ogwa li gwa etwa komutekulu gwe gumwe, ena omimvo ndatu. Ta ti, megumbo okwali mo naatekulu ye yatatu yeli kohi yomimvo ntano. Ta ti, otapandula oshoka inamu monena nando ogumwe oshiponga. Nakanyala tahokolola ta ti, okwali akuutumba poshipundi agondja, nani okulipo ashike ta kotha. Omutekulu gwe ngoka okwali akatala oshikuni shina omakala inaaga dhima nawa kelugo, eteshi umbile kombanda yondunda yomwiidhi, etayi tema. “Ondina uunkundi womagulu. Omulilo sho nde kegumona otagu yangata nale, ondali ndayi puushinda, nonande ka kwali tandi vulu oku endelela oshoka empango lyandje ondeli thigipo, sho ndahaluka komulilo,”Nakanyala ta popi ngaaka. Agwedhako ta ti, itavulu okutengeneka ongushu yiinima ayihe ya pila megumbo oshoka oyindji unene.
Ta ti, iilya yawo yali yalongo omvula ndjika nayo oyapyapo thiluthilu, inaputhigala nando olaata yimwe. “Ka kwali tandi vulu okudhima omulilo kungaye mwene omolwa uunkundi womagulu mboka ndina, ngeno ondakambadhala okudhima mpoka te vulu, naashinda sho yakathika, egumbo alihe olya kwata nale omulilo,” Nakanyala a hokolola.