Omimvo omugoyi dha piti, omukulupe gwomimvo 69 ngoka e na uunkundi wopamadhiladhilo, osho wo uulema womagulu ina vula okumona oshikwiila shaakulupe, osho wo openzela yuulema oshoka ke na uuthemba woshilongo.

Lavinia Ndeshihafela Lukas okwa yambuikile momukunda Onengali no.3 moshiopolwa shaHangwena.

Omukulupe ngoka e li monkalo ya pumbwa omayambidhidho omanene, iha vulu okweenda ye mwene, omolwuunkundi womagulu nomadhiladhilo kaage li pehala.

Rauna Ndawapeka Hishekwa, omwana a valwa kumumwaiyina okwa ti okwa ninga omimvo 14 ta kondjitha okumonena yinagona uuthemba woshilngo ihe okwa huulila muunyengwi nonando e na ayihe tayi pulwa koombelewa dhiikwameni.

“Otwa kala hatu talele po oombelewa dhiikwameni kEenhana ihe ohatu shunithwa ko ashike, anuwa oye li metifa okukonakona ngele omukulupe nguka Omunamibia tuu shili, ihe omakonakono gawo oga ninga ethimbo unene,” ta nyenyeta ngaaka.

Ta ti, oomvula dhomukulupe odhu uka komeho, ihe iha mono omayakulo gasha okuza kepangelo, oshoka ke na uuthemba.

Ta pula kutya oshike itaa vulu okukwathelwa ye oku na ayihe tayi pulwa, naamwayina oko ye li ye na uuthemba?

Eveline Lukas omumwayina gomukulupe, ngoka inaa thika momimvo dhopenzela okwa ti oku li muudhigu wokusila oshimpwiyu omumwayina omolwonkalo a taalela, oshoka naye ke na iiyemo yasha.

“Ohandi uhala tandi tumbu oku mu kutha mondunda noku mu shuna mo oshoka ita vulu okweenda ye mwene, nonando ha vulu okukookawa, thimbo limwe nando oto popi naye omadhilandhilo kage po pehala. Okuya koshipangelo ohaku pula mondjato, otandi kutha peni ngele nangame kandi na iiyemo,” ta popi neyeme.

Lukas ta ti ngeno okwa li ha mono openzela ye mwene ngeno onkalo otayi hwepopala.

Ta ti onkalo oya nyayika oshoka kape na ngoka he mu yambidhidha.  Aanona ye a li e na yaali oya hula ko ayehe.  

Omupopoliko muuministeli wiikwameni Magreth Kalo okwa popi kutya uuministeli owa ilongeidha aluhe okugandja omayambidhidho kaantu ya taalela uupyakadhi ngaashi mboka.

“Otatu kutha onkatu nokulandula omilandu adhihe opo tu vule okuyambidhidha omukulupe ngoka,” ta po pi ngaaka.

Ta gwedha po ta ti, omukulupe ngoka oku li nale momimvo dhesilohenda, onkene oku na okuyambidhidhwa mbala, oshoka nonando opwe ke ya uupyakadhi wulwe oku na uuthemba, naakwanezimo otaya ka longa nuupu.

Kalo okwa indile kehe ngoka a taalela uupyakadhi wokumona uuthemba woshilongo a thikame nena. 

Onkundana ya faathana omusamane gwomimvo 83 omukalimo gwomomukunda Oshaandja moshitopolwa shaShana Fillemon Johannes naye okwa huulile muunyengwi okumona uuthemba wopashigwana waNamibia.

Okwa hulile muunyengwi konima yomimvo dhi vulithe 20 sho a kala ta kambadhala okumona uukwashigwana nuuthemba wulwe woshilongo sho anuwa a kala nokutumwa koombelewa dha yooloka dhuuministeli wiipambele yomagumbo negameno. 

Johannes ota ti onkalo ndjoka otayi mu hepeke unene nofamili ye, ngaashi omahogololo ga thika oku na ehalo lyokuhogolola ashike ita vulu nokupewa okakalata kokuhogolola.

-vkaapanda@nepc.com.na