Omukulupe weedula 104 okwa xulifa konima eshi vati a dengwa noikuni komonamati vati e na oudu wopamadilaadilo.
Oshingwanima osha ningwa mexuliloshivike komukunda Enkombo moshitukulwa shaMusati efimbo lokonguloshi.
Nakufya okwa tongololwa oye Cecilia Vilho omukalimo womukunda Enkombo moshikandjohoololo shaEtayi. Omukulunhu wopolifi moshitukulwa shaMusati Commissioner Ismael Basson okwa hokolola ta ti omulumenhu weedula 36 okwa kufa oshikuni shomundilo ndele ta denge ina komutwe. Omukulupe okwa twalwa koshipangelo shaShikuku opo a ka mone epango lopaunamiti nokonima okwa tuminwa koshipangelo shaShakati molwaashi okwa li e li monghalo idjuu.
Opolifi oya hokolola tai ti omukulupe okwa xulifa konima yokafimbo kashona a fika moshipangelo shaShakati.
Omufekelwa oku li koshipangelo shaShikuku ta mono epango loudu wopamadilaadilo ashike oku li metonatelo lovapolifi. Nonande omido domukulupe ou nomona oda fa itadi tu kumwe opolifi oya koleka kutya odo omido di li poumutwe vavo voshilongo. Okwa didilikwa ovakulupe va ninga oihakanwa yokudengwa nokudipawa kovapambele vavo ve na oudu wopamadiladilo.
Omudo wa dja ko okwa lopotwa omulukupe weedula 82 a xulifa shaashi a tetaulwa nomakatana komutekulu waye weedula 42 kOkahao pefimbo kwa li e li mepya.
Otaku hokololwa kutya omufekelwa ou okwa hanga xekulu koshipundi ta fuda po e kwete ekatana olo kwa li ta longifa okutete oixwa mepya.
Onghee vati okudja opo omufekelwa ou okwa nyeka xekulu ekatana ndele te mu tete lwoikando ya yooloka nokuxulifila ponhele opo. Oshiningwanima shikwao, neudo moshipangelo shaShakati omwa lopotwa okamatyona komido 16 ka xulifa konima eshi ka dengwa kuvakwao mosaala yovanhu ve na oudu wopamadilaadilo.
Opolifi oya kumaida ovanhu tava tekula ovanhu ve na oudu wopamadilaadilo opo alushe va kwashipaleke kutya ovanhu ova nwa omiti davo depango.
– fhamalwa@nepc.com.na