ONGWEDIVA – Omulihongi moshiputudilo shaUnam Jose Eduardo dos Santos mOngwediva okwa pewa omhito yokulifutila mo modolongo noshimaliwa shoN$3000. 

Lukas Kativa oo teli hongele ouinginia okwa holoka momhangu yamengestalata waShakati oshivike sha dja ko, konima a kwatwa po shaashi vati a vaka oitenda yokutula keekompiuta mofikola yavo. 

Oshibofa shaye osha undulilwa komafiku 23 Februari 2026. Oshingwanima osha ningwa momwedi Juni mombelewa omo ha mu pungulwa eekompiuta i li moshiputudilo. 

Oinima ya vakwa po oi li pongushu yoshimaliwa yoN$45 000, ashike oya monika. 

Omukulunhu ta wilike oshiputudilo shaUnam shedina Jose Elduarddos dos Santos, Dr Petrina Johannes okwa ti Unam okwe li pyakidila nokuningila omuholingi ou omakonakono. 

“UNAM ita popile ovalihongi tava vake po omaliko oshiputudilo. Otuna okatendo oko taka ti ngeenge omulihongi okwa vake ota dulu okutewamo moUNAM,” ta ti. 

Okwa yelifa ta ti ova didilika omaliko taa kana moshiputudilo okupitila pamukalo woumbudi. 

Okwa kumaida ovalihongi opo va xulife po okuvaka po omaliko oshiputudilo molwashi otashi eta va kwatwe po oshoyo okutewa mofikola. 

“Itashi ulike efano liwa ngeenge omulihongi a tewa moshiputudilo,” ta ti. 

Omukulunhu wopolifi moshitukulwa shaShana Commissioner Naftal Sakaria okwa koleka oshiningwanima eshi shoulunga sha ningwa komulumenhu womido 22 eli modula onhi-2. 

Opolifi oya hokolola tai ti omafiku 18 Juni omukeleli womaliko okwa tuminwa etumwalaka komulihongi umwepo ta li kutya na ka tale kokafano molwashi opena umwe avaka oitandu yeekompiuta. 

Ota ku hokololwa kutya omukeleli womaliko okwa tala mombelewa omo ha mu tuvukilwa eekompiuta ndele ta mono kutya epakete ke li mo mboli. 

Opolifi oya hokolola tai ti omafikuk 31 July, omunawimo wopangela eekompiuta okwa shivifilwa ndele tai konhele oko kwa vakwa oitandu nokumona kutya eekompiuta adishe ka kwa li tadi longo shaashi da vakwa oitandu oshoyo eengodi odo di kwatafana opo okompiuta i longe. Ovanambelewa ova ka tala natango kokafano ndele tava monoko omulihongi aumbata epakete mu na oitandu yokutula keekompiuta. 

Opolifi oya ti omafiku 4 Aguste, omulihongi okwa ya komukeleli womaliko aumbata ondjato muna oinima oyo avaka po ndele te mu lombwele kutya okwe ya aula. 

Omukeleli womaliko okwa shivifila vakwao oshoyo ovanambelewa moUNAM ndele tava lopotele opolifi. 

-fhamalwa@nepc.com.na