Omulumenhu weedula 55 e na oudu wopamadilaadilo okwa xulifa eshi a ponokelwa keendjaba pefimbo kwa li ta ende moixwa a pwilikina oradio yaye. 

Olutu laye ole lituwa mEtivali efimbo lomutenya koSesfontein moshitukulwa shaKunene. 

Nakufya okwa tongololwa oye Benard Aseb. 

Omupopiliko wopolifi moshitukulwa shaKunene Warrant Kristofin Hamunyela okwa koleka oshiningwanima eshi ta ti omulumenhu ou okwa ninga omafiku a kana okudja Etivali loshivike sha dja ko. 

Otaku hokololwa kutya opolifi oya kala nokupula moshiwana tai kongo Aseb ashike kakwa li a monika. 

Opolifi oya hokolola tai ti ponhele opo omulumenhu ou e lituwa opa hangika omakondo eendjaba da lyatauka osho yo oradio yaye oyo kwa li ta pwilikine. 

Olutu laye ola hangika la dedaulwa medu nokwa monifwa oshiponga. 

Opolifi oya hokolola tai ti eendjaba kadi hole omaweelelo naashi otaku fekelwa pamwe kutya osho oshietifi opo Eseb a nukilwe keendjaba. 

Otaku hokololwa kutya natango neudo moshitukulwa shaKunene okwa li mwa lopotwa omunhu a dipawa keendjaba. 

Opolifi oya kumaida oshiwana opo shi kale kokule neendjaba shaashi oda nyika oshiponga. 

-fhamalwa@nepc.com.na