Okaana kokamati ke na odula neemwedi nee oka xulifa eshi vati ka pondwa kuxe ndele te ka kupula moixwa. Oshiningwanima osha ningwa Omaandaxa komukunda Ombazu moshitukulwa shaKunene.

Omupopiliko wopolifi koshitukulwa shaKunene Warrant Kritofina Hamunyela okwa koleka oshiningwanima eshi, ta ti xe yokaana weedula 34 okwa li tava tanguna nomukainhu waye ou e li ina yokaana Osoondaxa efimbo loufiku.

Xe yokaana nomakainhu waye aveshe ovakwashiwana Ovaangola.

Otaku hokololwa kutya okudja opo omulumenhu ou okwa tameka okudenga omukainhu waye neengonyo. 

Nokonima yefimbo omufekelwa okwa tameka okukupulashi omakumbafa nomaliko oo kwa li monduda ndele te a tomeke omundilo.

Opolifi oya hokolola tai ti efiku olo omufekelwa okwa faduka po nokaana kaye.

Okwa ninga omafiku ta kongwa kopolifi ashike ina monika. Onghela efimbo longula omufekelwa okwa ya keumbo lovakwapata vaye ashike ka kwa li e li nokaana.

Otaku hokololwa kutya ovakwapata ova lopotela opolifi fiyo ta kwatwa po.

Opolifi oya hokolola tai eshi omufekelwa a pulwa okwa lombwela kutya okaana oke li peni okwa nyamukula ta ti okwe ka ponda fiyo ta kafi.

Vati okwa ya nopolifi ndele ta ulike ponhele opo a kupula omona waye.

Ina yokaana okwa li a tambulilwa moshipangelo molwashi okwa monifwa kwa li oshiponga.

Omufekekwa ota holoka nena momhangu nota pangulilwa oshibofa shedipawo oshoyo shomahepeko omomaumbo.

Omakonakono opolifi otaa twikile moshikumungu eshi.