Auleria Wakudumo 

Omulumenhu weedula 42 okwa dipaa vati kahewa kaye kopaihole kwali weedula 50 ndele naye mwene teli kufa omwenyo eshi elimangeleka vati neemwiya deenghaku. 

Oshiningwanima osha ningilwa moBlock E moRehoboth, Osoondaxa lwopo 04h00 lwaapo. Omukainhu okwa tongololwa oye Sofia Nero nomulumenhu okwa tongololwab oye Christiaan Kooitjie. 

Edi oda kolekwa komupopiliko wopolifi Deputy Commissioner Kauna Shikwambi. Otaku hokololwa Kooitjie vati a hanga Nero meumbo lomulumenhu umwe vali ndele ta pula a yeululwe. Eshi inava yeulula omuvelo, Kooitjie okwa longifa vati oshitenda shokuninga omadewo ndele ta ngwalula po omuvelo. 

Mokumona omuvelo wa yeululwa, omulumenhu oo ali monduda naNero vati okwa twipuka mo ndele ta ka konga ekwafo. 

Opolifi oya holola kutya eshi ya aluka nomulumenhu oya hanga Nero a tuwa nombele oikando itatu mofingo. Eshi opolifi ya twikila okukonga Kooitjie, oya hanga naye elimangeleka meumbo laye neemwiya deenghaku. 

-wakudumoauleria@gmail.com