Auleria Wakudumo 

Opolifi moshitukulwa shaTjozondjupa otai konakona oshibofa shelikufomwenyo omo omunangeshefa e shiivike nawa a xulifa eshi vati e limangeleka. 

Oshiningwanima eshi osha ningilwa meumbo lanakufya molukanda Oshetu No. 1 mOkahandja, mEtitatu lwopo 03h07. 

Nakufya okwa tongololwa oye Christian Shiikeni, mwene wobar hai ifanwa oZee World ili molukanda lavo. 

Omupopiliko wopolifi moshiotukulwa shaTjozondjupa, Maureen Mbeha okwa koleka oshiningwanima eshi. 

Opolifi oya holola kutya Shiikeni vati okweli kufila omwenyo mokandjuwo meumbo laye nongodi yolusheno. 

Otaku hokololwa ina fiya po sha tashi holola osheetifi shefyo laye. 

Omukainhu a shashaula mukwao molwaoN$15 

Omukainhu weedula 41 ota mono epango lopaunamiti eshi vati a shashalwa nekatana kumushiinda shaye shaashi ali ta pula eendjo daye doN$15. 

Oshiningwanima eshi osha ningilwa poundingosho hava ifanwa Eehema, Oikango mOngwediva, mOmaandaxa lwopo 20h00. 

Omukulunhu koshikondo shokukonaakona oimbuluma moshitukulwa shaShana, Deputy Commissioner Frederick Ndjadila okwa koleka oshiningwanima eshi. 

Otaku hokololwa nakuningwa oshihakanwa vati oya koundingosho oko a hanga mushiinda shaye womukainhu nokumupula eendjo daye doN$15. 

“Konima ovakainhu ava ova hovela eenhamanana molwa eendjo doshimaliwa shoN$15, osho sha eta umwe a kufe ekatana nokushashala mukwao momutwe,” Ndjadila ta ti. 

Nakuningwa oshihakanwa okwa twalwa koshipangelo shepangelo shaShakati oko ta mono epango lopaunamiti la wedwa po nokuli monghalo ili xwepo. 

-wakudumoauleria@gmail.com