ONGWEDIVA – Kansela woshikandjohoololo shaGuinas Moses Khumub okwa ti ombelewa yaye oya tameka okuninga omitumba noovene vomikunda, ovadali novanafikola nelalakano lokukundafana kombinga younona voshiwana shOvasan ovo tava tu ofikola okati. 

Okwa ti oshikandjohoololo shaye osho shimwe sha didilikwa shi na omwaalu muhapu wovanafikola va dja momidingonoko doshiwana shovayelele tava fiye po ofikola. 

“Onda tameka okuyandja ouyelele kombinga yefimano lehongo,” kansela ta ti. 

Khumub okwa ulikwa a ninge kansela waGuinas neudo muJanuali neudo, a ya ponhele ya kansela Elia Barney Martinus oo a xulifa omudo wadja ko. 

Khumub okwa ti ota lalakanene ovanafikola voshiwana shovayelele va kale mofikola molwashi osha fimana ngeenge omunhu a longwa. 

Okwa weda po ta ti okwa kumaida ovanafikola keefikola da yooloka noshoyo ovo va fiya po ofikola opo ve li tulemo moinyangadalwa yavo yofikola. 

“Ngeenge ova yi kOshivelo oto hangeko ounona va fiya po ofikola tava landifa momapandaanda osho shi li sha puka,” ta ti. 

Khumub okwa ti ombelewa yaye otai shi endifa nawa okuyandja oikulya yoshikukuta koshiwana okudilila kepangelo. 

“Fiyo opapa ina tu didilika oupyakadi wokutopolela oshiwana oikulya,” ta ti. 

Kombinga yomayakulo ohauku, kansela okwa ti ombelewa yaye oya kwatafana nombelewa yomukulunhuwiliki wouhaku opo i kale tai twala omayakulo opaunamiti komikunda odo di li kokule noupangelo. 

Okwa yelifa ta ti ovanhu ova tameka okuetelwa omayakulo opaunamiti popepi unene tuu ovakulupe novanhu ve na oulema. 

Khumub okwa ti natango ombelewa yaye otai longele kumwe nombelewa yokuyandja omaufembo opo i kale tai tumu ovanambelewa va ete omayakulo popepi okuyandja omaufemba koshiwana. 

Kansela okwa ti okwe li pyakidila okulongela kumwe nouministeli wounamapya opo u kela tau yambidida ovanyasha okutotapo oikunino yavo.