Auleria Wakudumo 

Ovakwanedimo vomunangeshefa Johannes Shivute Shithigona, nedina la shivika nawa Shilemba oo a xulifa moshipangelo mOngwediva ova holola kutya ova kanifa ongudi yepata, omunambili nomuyandji mayele muwa. 

Shilemba (76) ngaashi a li ha ifanwa kuvahapu, okwa dalwa mo1949 momukunda hau ifanwa Oshilemba, omukunda oo we mu pefa edina laye. Shilemba okwa hovela ongeshefa yaye eshi a ya koOranjemund moshitukulwa sha//Kharas omanga e li meedula dounyasheelela. Momudo 1989, Shilemba okwa tameka ongeshefa yaye yotete, yoyeendifo. Ongeshefa ei okwe i tameka notuwa yaye yopaumwene. Molwaashi okwa li ha ifanwa nedina lomukunda oko a dja, Shilemba okwa twikila yoo okuluka eengeshefa daye edina olo tuu olo. 

Okwa twikila nOshilemba Super Market mUupindi mOshakati, Oshilemba Transport oyo ya li hai twala ovanhu okudja monooli va uka kOranjemund, Oshilemba Club Funky Town mOshakati. Shilemba, omukalimo womomukunda Oshilemba moshitukulwa shaMusati okwa xulifa Osoondaxa moshipangelo shaMediPark mOngwediva konima youvela uxupi. 

Omona waShilemba, Sammy Shithigona okwa hokolola xe omunambili, ke hole omanyenyeto noku na elongelokumwe. 

“Keshe efiku oha meneka ta i koilonga nokwa kala e hole okulonga oilonga yaye mwene,” omonamati ta ti. 

Otaku hokololwa yo kutya Shilemba okwa kwafela vahapu momudingonoko osho yo ovo ehe shi. Okwa kwafela yoo okwee ta po ongeleka yaElcin kOmbogodhiya novanangeshefa vakwao. 

Shilemba okwa fiya ko ounona ve li 11, ovamwaina vavali novatekulu. 

-wakudumoauleria@gmail.com