Ongeshefa yoRani Group oya yambidida okaana kokamati keedula nhano nokatemba konima eshi ka dalwa noulema. 

Okatemba oka yandjwa Etivali keumbo lavo komukunda Ohaingu moshitukulwa shaHangwena. 

Omukulunhuwiliki wongeshefa yoRani Group Ali Dharani okwa ti ota lalakanene okushakeneka epangelo ondjilakati tashi pitile mokuyambidida ovanhu tava mono oixuna koluhepo. 

Okwa yelifa ta ti ongeshefa yaye ohai yambidida ovanhu koitukulwa ya yooloka ngaashi ovanafikola osho yo ovanhu ve na omaulema a yooloka. 

Dharani okwa ti omudo keshe oha futile ovanafikola hava di moshitukulwa keshe va pita nawa ondodo onhi-12 fiyo tava mane koiputudilo yopombada. 

Okwa weda po ta ti konima yeedula mbali natango okwa li a yambidida oitukulwa aishe 14 noutemba ovo kwa li va yandjwa keembelewa doongoloneya. 

“Ondi na eefitola koitukulwa ya yooloka nondi li nda yandja oilonga kovanhu. Ohandi lalakanene okukandula po omukundu wokuhe na oilonga moNamibia,” ta ti. 

Okwa ti ota twikile okuyambidida ovanhu tava mono oixuna nelalakano lokulwifa ondjala noluhepo. 

Pefimbo ta tambula ko okatemba kokaana kaye, Ndilimeke Vilho okwa ti paife ota dulu okufiya po okaana kaye ta i koilonga shaashi otaka kala taka undulwa kokatemba. 

“Onda pandula ongeshefa yoRani Group eshi ya yambidida okaana kange,” ta ti. 

Okwa ti oku na omukumo wokukonga oilonga shaashi onghalo yokaana kaye kai shi vali idjuu. 

“Paife oshipu okufila ovaneumbo vange okaana ke li kokatemba mokufaafanifa nale,” ta ti. 

Okwa ti okwa pumbwa yo natango omakwafo oikulya osho yo omilambo molwaashi okaana ihaka dulu okuya kondje. 

-fhamalwa@nepc.com.na